Tukin khawvar hmaa ruah sur leh thlipui avanga Laipuitlanga leiminin in 9 a hnawlnaah khan mi 17 an thi nia hriat a ni a, ruang 10 lak chhuah tawh a ni.
SP (Traffic) Pu Lallianmawia hnen a\anga thudawn danin mi 7 chu in chim hian a la delh bet nia hriat a ni a; an dam chhuah beiseina a tlem tawh hle. In chimin a delh zinga hnam dang awm chhun Zakir Hussein chu chawhma lam kha chuan a thawm hriat tur a awm a, a \hiante nen pawh mobile-in an la inbia a; mahse chuti maia lak chhuah a rem loh avangin chawhnu lamah chuan a thawm a reh ta nia thudawn a ni a. Hliam zinga dam taka an lak chhuahte hi mi 6 an ni a, an zinga 4 chu hmeichhia an ni. Leimin hian Tipper 1, motor te chi 5 leh ke pahnih nei engemawzat a delh chhe bawk a ni.
Aizawl Laipuitlang tlangsang laia PWD SDO Office building chimin a hnuai kham pheia chenna in 9 vel a hnawl avanga thi an ruang lak chhuah tawhte chu – H.Lalthasanga (31) S/o H.Lalsangzela, Ramhlun Venglai, Tv. Lalrelfela (22) S/o Lalsailova, Ramhlun Venglai, Pu H.Lalnunmawia (42) S/o Romawia, Ramhlun Venglai, Tv.Hmingthanpuia, Laipuitlang Rabung Khua, Lalmuanpuii, Thingfal, Lalduhsaki W/o Vanlalhmuaka, Melonie Lalhriatchhungi (13) D/o Vanlalhmuaka, Lalrinzuali (22) D/o Vanlalhmuaka, V.Johana Thingfal khua leh Lalthafeli (13) D/o Lalbela, Rabung khua te an ni.
Hliam lakchhuah tak te chu – Numberliani, Laipuitlang Lalremruati W/o H.Lalnunmawia, Lalrinsiama, Rabung Khua, Laldinhluni W/o H.Lalthasanga, Ramhlun Venglai leh Lalhlimpuii, Thingfal khua te an ni a.
Chinhriatlohva la awm leimin leh in chimin a delh nia hriatte chu – L.Rindika Rabung, Lalramnghaki Rabung, Lalrindika Thingfal, Zothanpuia Thingfal, Lalremchhungi Thingfal, Vanlalrema Hnamte South Lungpher leh Zakir Hussein, Karimganj te an ni.
Chhanchhuahna hna hi State Disaster Response Force te bakah, Fire & Emergency Service, Armed police \hahnem takin chhanchhuahna hna hi an thawk a, chhanchhuahna hna hi chhunzawm zel tura tih a ni a, Police-lamin an duty dan tur an duang lawk ang a, YMA Branch hrang hrang te’n ei leh in tur buaipui tura ruahman a ni a. Ramhlun Venglai YMA Branch Vice President Pu Zohmingliana’n kan Corr. a hrilh danin nichin deuh khan ruang zawn leh chhanchhuah hna hi chawlhsan lailawk a ni a. Central YMA lam ruahmanna angin Aizawl hmar lama branch te’n zanriah ei kham a\angin an chhunzawm leh anga tlaivarin an thawk dawn a. Ramhlun Venglai bikah chuan ruang pathum an phum tawh a; chutihlaiin Rabung khaw mi 3 ruang lak chhuah tawhte chu an kuangte siam sakin an thawn haw chho mek bawk. Rabung khaw mi tho mi 2 ruang la hmuh lohte pawh an vengin buaipui tur a nih thu Pu Zohmingliana chuan a sawi a ni.
Mizoram State Transport lam atanga thu kan dawn danin MST Bus Pali( 4) ruang phur tur leh an chhungte phurhna turin thawn chhuah a ni ang a, hemi avang hian heng khuaahte hian Thawh\an ah MST Bus Service a awm thei dawn lova, Thawhtanni zin chhuah tum te hriatthiamna an dil nghal a ni. MST Bus pahnih hi Rabung-ah tirh an ni ang a North Khawbung leh Thingfal-ah pakhat ve ve tirh an ni bawk ang.
He chhiatna rapthlak tak thlenna hmunah hian nikum October ni 11 khan PWD (Mechanical) Office dinna a chet a vangin a building a khi a, PWD quarters a cheng chhungkaw 5 an insawn chhuak a, a thlanga cheng chhungkaw 4 pawh an lo inthiar chhuak tawh a ni.
– AIR