Thlichhia (Cyclone) na tak Mahasen tia vuahin tun ni 3 chhungin Mizoram a nuai dawn nia thuthang chu ralkhelna tur a nilo niin Science and Technology Wing-a Principal Scientific Officer Dr. Vanlalzara’n a sawi.
Dr. Vanlalzara sawi danin he thli chhia hi a lo tleha Mizoram a rawn thleng a nih pawhin Ningani hma chuan a lo thleng dawnlo hrim hrim a ni a ti a, tun dinhmuna a lan dan chuan thlipui hi Bangladesh lamah a kawi a, Mizoram a rawn thleng ve a nih pawhin a na tawh lo tura ngaih a ni a, hemi hnua tleh chhunzawm chuan Mizoram chhim lam chu a thawi ve chauh mai thei niin a sawi a, Mipui chiai lo turin a chah a ni.
Science and Technology hotute hi nimin khan Chief Minister ho-a meeting-ah telin Guwahati-a Meteorological Centre te nen an inbiak pawh thu sawiin ‘Mahasen Cyclone’ hi Mizoram tan tun thla ni 16 hma chuan ala hlauhawm loh tur thu an sawi a, cyclone chet dan hi englai pawha thlithlai reng a nih leh Mizoram alo thleng a nih pawhin a chakna tam tak chu hloh tawh an rin thu an sawi a ni.
Cyclone tleh tur thuthang avang hian mipui an ralkhel hle a, Aizawl-ah chuan school ṭhenkhat chu vawiin aṭangin ni 3 chhung khar tura tih a nih thu thulakna chuan a tarlang.