Zothlifim Logo
Loading ...
Serchhip NewsSerchhip Chanchinthar

Mizoram Journalists’ Association (MJA) Serchhip District hruaitute chuan Serchhip mipui ten Vawksa thianghlim chauh an ei theihna tura hmalakna chungchangah nimin khan Serchhip District AH&Vety Officer, Dr. Vanlalenga chu a Office-ah an kawm.

MJA Serchhip District hruaitute hian DVO hnenah hian tunhnaia Vawk hri leng avanga mipui ten sa thianghlim chauh an ei theihna tura AH&Vety Department in hma an lakna chu lawmawm an tih thu sawiin, amaherawh chu mipuite ei tura Vawk talh tur endik ṭhin chu an endik danah duhthu a sam tawklo nia an hriat thu te, a sa zawrh tura Vawk talh zingah a hri vei an awm ngei nia an hriat thu leh Certificate pekchhuah chu diklo taka hman zui theih dan a awm nia an hriat thu te an sawi a.

Hemi chungchangah hian Dr. Vanlalenga chuan thawktu indaihlohna avangin harsatna an tawh thu leh tun dinhmun ah Doctor pakhat chauhin heng Vawk talh turte hi a endik ṭhin thu a sawi a. MJA hruaitu ten Vawk hriselna dinhmun enfiah dan an duhkhawplohna an sawi te chu lo enfiah a nih tur thu sawiin, Certificate hmansual awm thei chungchang pawh a ṭul anga endiktu tur ngaihtuah turin thuneitute hnenah thlen nise an ti bawk. Serchhip-ah hian mipui ten Vawksa thianghlim ngei an ei theihna turin tun thla May ni 3 aṭang khan Vawk talh turte chu AH&Vety Department ten an enfiah ṭhin a ni a, a sa zawrh tura Vawk talh turte reng reng chuan a hma ni chawhnu dar 2:00 hmain AH&Vety Department Doctor te an hriattir a ṭul a ni.