Zothlifim Logo
Loading ...
Mizoram NewsMizoram News

Lunglei aṭanga Kms. 23-a hla Chakma pemkhawm khua a ngaih Sibinasora Bawk, sawrkarin ṭhiah tura a tih chu tun thlenga chhuahsan an la awm loh avangin thlaleh thla ral hmain chhuahsan vek ni se tih Lungsen khawtlang huap pawl hrang hrangin an rel.

Lungsen VC, MZP leh MSU Joint meeting chuan, mihring 182 awmna Sibinasora hi Tlabung DFO chuan kumin March ni 15 ral hma khan chhuahsan vek turin a hriattir tawh a, he hriattirna lehkha hi ngai pawimawh lova tun thlengin an la awm chu sawrkar zahlohna lian takah an ngai tih an sawi a ni.

Lungsen MSUSub.Hqr chuan Lungsen VC ram chhunga dan lova Chakma ten in leh lo an din a, bawk an khawh ve ringawt chu ṭhalo an tih tih an sawi a, he bawk hi Chakma foreigner te tana inbenbelna awlsam tak a nih theih mai avang in leh Mizo te tana thil ṭhalo thlen thei a nih avangin an dodal tlat tih an sawi a ni.

Hetihlai hian, Lungsen VC te chuan he bâwk hi din a ni tih an hriatpui lova, din a nih dawn pawhin hriattir anni lo niin an sawi a, Sibinasora an tihah hian in 40 awmin Lungsen VC ram chhungah in 28 a awm a, Zodin VC ram chhungah in 12 a awm bawk.

Lungsen khawtlang aiawhte meeting chuan he bâwkah hian SSA-in Primary School a din tawh tih sawiin, hetianga dan lova bâwk khawha school lo din hi ṭhalo an ti a, SSA pawh an hma-lakna te chhunzawm tawhlo se an ti tih an sawi a ni.