Pu Lalrammawia, Principal, DIET, Serchhip chuan zirna kalphung thar chu zirlai thiamthei lo, thiamna (talent) dang nei te tana pass ve theihna tur a ni a ti.
He thu hi tunkar Thawhlehni zana Neihloh Primary School-a CCE leh RTE campaign neihnaah a sawi a, Inkhawm, Pu Luahzauva Neihloh Branch YMA President kaihhruaia neihah hian Pu Mawitea chuan powerpoint hmanga CCE leh RTE sawifiahin, zirna kalphung tharah tun hmaa kum khata vawi 3 exam awm ṭhin kha a awm tawh loh thu te, a aiah Unit test chhum lo chat lova neih kal reng a nih thu te, Zirlai bye-heart leh chhiarkawp chawh chi ten mark zawng zawng a ken tawh loh thu te, activities leh assignment aṭangin, thiamna dang nei ten pass mark an hmuh kai ve theih thu te, Unit test-ah pass mark hmu pha lo te test nawntir leh zel an nih ṭhin thu te, CCE ah zirlai te chu fail thei lo an ni ngawt lova, fail lo turin an thiam ngei ngei tur a ni tih chu ngaih pawimawh zawk a, hetiang a nih avang hian nu leh pa te pawh in mahni fate zirna lama theihtawpa puih a tul thu te a sawi.
He campaign hi Sub Hqrs YMA Serchhip hnuaia Education & Youth Affairs leh DIET ṭangkawpa neih niin, zawhna leh chhanna hun Sub-hqrs YMA EYAC Chairman Pu C. Lalhminghlua kaihhruaia neih a nih bakah DIET Lecturer pahnih Pu John Zorammawia leh Pu R.Lalhmangaiha ten mipui zawhna an chhang a, zirna kalphung tharah chuan zirlai ten school chu nuam an ti tur a ni a, inhrem awih loh ni ngawt lovin rilru na lutuka insiam phal loh mai a ni zawk a, zirlai te chuan zirtirtute chu an hlau tur a ni lova, nu leh pa angin an nel tur a ni tih te an sawi.
He hunah hian Neihloh khuaa zirlai nu leh pa te leh zirlai ṭhahnem tak telin K.Lalnunsiami a zai bakah, Neihloh VC Secretary Pu Lalthankhuma pawhin thu a sawi a, Chhim Veng Branch YMA President Pu Thang ngaizuala’n lawmthu sawiin kalkhawmte a tin a ni.