Mizoram Election Department chuan Lok Sabha inthlan leh Hrangturzo Assembly biala inthlan ṭhat hun tur atan thlaleh ni 9 a ruat thu nimin khan a puang a, inthlan hun puan a nih tak avang hian nimin aṭang khan inthlan Model Code of Conduct pawh hman ṭan nghal a ni.
Chief Election Officer Ashwani Kumar chuan nimin khan I&PR Auditorium a thuthar lakhawmtute kawmin, inthlan hun ruat te hi a sawifiah a, inthlan chungchang hriattirna hi tun thla ni 15 ah tihchhuah a ni ang a, hemi hnu ni 22 ah candidate te hming pek luh hun khar a ni ang a, ni 24 ah hming pekluh te endikin ni 26 thleng inhnukdawk duhte tan hun hawn a ni dawn a ni.
Thlaleh April ni 9 a vote thlak a nih hnuah May ni 16 ah ramchhung hmundang rualin vote chhiar a ni ang a, inthlan leh a kaihhnawih thil zawng zawng chu May 28 a zawhfel tura ruahman a ni.
CEO chuan inthlan hun puan anih avangin Model code of conduct hman nghal a nih thu a sawi a, campaign tute pawh tluang taka inthlan boruak a awm theih nan thu dengkhawng leh mawi lova inbei lo turin a chah a. Inthlan buaipuitute pawh ngawrh taka zirtirna pek thuai an nih tur thu leh karlehah EVM endikna hmasa ber neih nghal a ni dawn tih a sawi bawk.
Lok Shaba MP inthlan leh Hrangturzo biala inthlan ṭhatna tur atan hian Maharastra aṭangin EVM 1700 chuang Bharat Electronics Ltd (BHEL) siam hman a ni dawn a, Electronics Corporation of India (ECIL) EVM hlui te chu hman loh vek tum a ni.
MNF-in ECIL EVM te a dikhlel nia court-a an zualko avangin heng EVM te hi a ṭul huna Court-a endik theih tura Strong room a kalh hnan a ni tih CEO chuan a sawi a hei vang hian tun ṭum inthlana hman tur EVM tharte chu strong room tharah dah tura tih a ni, tih a sawi bawk.
Tun ṭum inthlanah hian Hrangturzo a candidate te chuan senso atan cheng nuai 20 thleng an hmang thei tawh dawn a, Lok Sabha member te chu cheng nuai 70 thleng hman phalsak an ni.
CEO chuan tun thlengin Eletoral Rolla chuang mi nuai 696000 chuang an awm mek tih a sawi a, amaherawhchu candidate te hming pek luh tawp hun thleng roll-ah a la inthun thar theih avangin a la danglam thei tih a sawi bawk a ni.
Inthlanah hian Team leh Squad hrang hrang chu dina kalpui chhunzawm a ni dawn a, VVPAT chu mamawh tawk siam hman a nih mai theiloh avangin hman a nih dawn leh dawn loh hriatchian ala ni lova, Tripura campa Tuikuk te vote thlaktir tur leh tur loh chungchangah ECI thutlukna ngaihchan mek a ni a, hetihlai hian CEO chuan Assam a 3rd battallian awm mekte chuan vote an thlak theih nan Service voter anga inziah luh theih ani tih a sawi a ni.