Serchhip August 11, 2014: Animal Husbandry & Veterinary Department chuan kum 2 chhungin vawk note 5,500 sem hman an tum a, heta atang hian vawk note 88,000 thar tumin hma an la mek.
AH & Vety Department thawktute sawi danin RKVY sum hmangin kum 2013-2014 chhung khan vawk note hi 2,000 sem a ni a, heta tang hian vawk note 32,000 tharchhuah beisei a ni a. Kumin 2014-2015 chhung hian vawk note 3,500 sem chhuah leh tum a ni a, heta tang hian kum khat chhungin vawk note 56,000 thar tumin hmalak mek a ni. Vety department chuan kumin chhung vek hian vawkpui 10 zel vuh theihna programme a duang a, hemi hnuaiah hian vawkpui vulh tura thlanchhuah chhung kaw 132 te hnenah nuai 2.50 theuh pek a tum bawk.
AH & Vety Department chuan Mizoramah vawk hrisel, PRRS vei lo hmanga vawk raitir a nih theihnan Pig Artificial Insemination an kalpui mek a, Selesih ah hmunpui Boar Semen Station din a ni tawh a, heta tang hian vawk chi tha, PRRS kai lo, Canada atanga lakluh hmangin vawk kahrai kalpui mek a ni a, hemi atan hian nuai 408 hman a ni. Hei bakah hian Piglet Multiplication Farm, Thingsulthliah ah vawkpui 200 vulh theihna tur din mek a ni a, he farm hian kum tin vawk note 3,800 a thar thei dawn a ni.
Tunlaia leng mek vawk natna chi khat PRRS (Porcine Respiratory and reproductive Syndrome) hi kum 1987 khan USA ah hmuhchhuah a ni a, he natna avang hian US chuan kumtin dollar maktaduai 600 hloh ziah anga chhut a ni.