Zothlifim Logo
Loading ...
Mizoram NewsMizoram News

Nizan dar 7:30 bawr vel khan Republic Veng, Aizawl ah Mizoram a thil thleng thei tur pawha lo ngaih loh, thil rapthlak tak a thleng a. Republic Veng mi tho Laltlanchhuaha (37) s/o. Parzuala chuan Republic Presbyterian Biak In thlanga awm Pu Sangliansiama te chhungkua mi 5 (panga) chu chemte hmangin a tihlum a ni.

Pu Sangliansiama te chhungkua hi Republic Presbyterian Biak In thlanga Springfield Higher Secondary School Building chhawng chung ber, kawng-an chung luah an ni a. He misual Laltlanchhuaha hi Pu Sangliansiama te inah hian lutin, pawisa a dil a, Rs. 1000/- an pe a. Pawisa hi a dil belh a, chhungkaw pa ber Pu Sangliansiama’n a hnial chu Pu Sangliansiama (57) s/o. Chalneihthianga (L) hi a vit nghal a. Pu Sangliansiama farnu Pi Vanlalchhungi (54) hlau tlan chhuah tum chu Laltlanchhuaha hian hnuklutin a vit zui a, kawngkapui chu chhunglamah a kalh nghal bawk. Chhungkaw nu ber, Pu Sangliansiama nupui Pi Khualthangi (57) bedroom a tlan lut chu Laltlanchhuaha hian um zuiin, a vihhlum hnuah Pu Sangliansiama nau Chalkunga (Chungtlang) fa Samuel Lalrinchhana (14), Springfield School a Pawl 9 zirlai chu a that leh a. Pu Sangliansiama leh Pi Khualthangi te fa neihchhun kum 5 mi Isaac Lalrinnunga chu misual hian na takin a vit hliam bawk a. Hetih lai hian mangang au thawm hriain mi engemawzat chuan Pu Sangliansiama te In hi an thleng a, misual Laltlanchhuaha chu tukverhah zuang thlain, inhnuaiah Hostel naupang ten an lo man a, kawngpuiah mipuiin bawrin, In hnai ber Pi Lalhluti Inah an hnuklut a, khawtlang hruaitute leh Police ten an veng zui a, mipui ten luh chilh tumin police te nen hian rei tak an innawr a. Mipui lam hian tualthattu chu a hmel tal hmuhtir an phut bawk. Hliam na tak tuar chunga damdawiin panpui Isaac Lalrinnunga (5) chu damdawiin thlenpui a nih hmain a thi ve leh bawk a, Laltlanchhuaha kuta thi hi 5 (panga) lai an tling ta a ni. An awmpui nula Ze-i chu bathroom ah a inkalhkhum a, a him hram a. Heti hian, Pu Sangliansiama te chhungkaw member zingah hian Architect Lalhriatpuia s/o. Vanlalchhungi chiah a him a, ani hi veng danga a thiante inah chaw a ei avangin he thil thlen lai hian an inah a awm ve lova; mitthi zing ami Samuel Lalrinchhana s/o. Chalkunga hi Reiek thlang Chungtlang khuaah phurh thlak a ni ang. Kan hriat awlsam zawk nan, Pu Sangliansiama nupui Pi Khualthangi hi Zoram milar Pi Veronica K. Zatluangi nau a ni.

Misual kut tuara thite ruang hi nizan rei tawh takah khan Aizawl Civil Hospital Morgue House ah post mortem a ni a, vawiinah vuiliam an ni ang. Pawi rapthlak tak khawihtu Laltlanchhuaha hi, amah hre \hangtute chuan zu chu in ve thin a ni tih sawiin, tunhma lamin khawtlang tana harsatna siam leh hnawksak zawnga a awm an hriat ngai loh thu an sawi a, hetianga rapthlak taka a che ta mai hi mak an tih thu an sawi hlawm. Mipui thinurte leh Police te innawrna lamah Laltlanchhuaha an hnuh luhna Pi Lalhluti In leh a bul chiaha a fapa Pu Lalthangmawia te In chu a chhe nual nghe nghe a. Central YMA hruaituten an uap vangin boruak sa hulh pawh a ziaawm a ni. Laltlanchhuaha hi mipui hriat loh hlanin tukin dar 2:30 vel khan Police ten an hruai chhuak a, Central Jail ah dah luh nghal a ni.

– Zonunsanga Khiangte via Zonet zing daifim