SBI Chief Arundhati Bhattacharya, ICICI bank hotunu Chanda Kochhar, Biocon founder Kiran Mazumdar- Shaw leh HT Media Chair Shobhana Bhartia te chu Forbes-in khawvela hmeichhe thilti thei 100 a thlan chhuah zingah an tel a, khawvela hmeichhe thil ti thei berah hian German Chancellor Angela Merkel chu an thlang leh a, Merkel hian a zâwnin kum 5 zet he dinhmun hi a luah tawh a ni.
He list-ah hian India chhul chhuak hmeichhe pahnih PepsiCo Chief Indra Nooyi leh Cisco Chief Technology and Strategy Officer Padmasree Warrior te pawh an lang tel bawk a ni.
Kum 59-a upa, SBI hotu Ms Bhattacharya hi 30-na a ni a, nikum khan 36-naah a awm a, Forbes tarlan dan chuan a hnuaiah hian branch 16,000-ah staff 2,20,000 thawkin mi maktaduai 225 tan an thawk a, an thil neih hlut zawng hi USD tluklehdingawn 400 a tling a, khawvel ram 36-ah an inzar darh niin a tarlang a ni.
Nikuma 43-na, kum 53 mi, ICICI Bank CEO & Managing Director Ms Kochhar hi kuminah 35-naah a rawn kai chho a, Forbes chuan Ms Kochhar hi India-a Private Sector Bank lian ber her danglam tura hmahruaitu tiin a sawi a ni.
Kum 62-a upa, Ms Mazumdar-Shaw hi nikum khan 92-na niin, kuminah 85-naah a kai chho a, kum 1978 khan Biocon hi a din a, a tirah chuan enzymes company tereuh te dinin bul a ṭan a, tunah chuan india rama biopharmaceutical company lian ber niin nikum khan hlawkna USD tluklehdingawn 460 an lalut a, an thil siam hi khawvel ram 85-ah an thawn darh tawh a ni.
Kumina a vawi khatna atana rawn lang Ms Bhartia hi HT Media hotunu niin, English leh Hindi-a tihchhuah Hindustan Times bakah Sumdawnna lam ziahna Mint publisher a ni.
He list Top 10-ah hian US President atana mi ṭhenkhat beisei mek Hillary Clinton chu pahnihnaah a awma, philanthriopist Melinda Gates (3), Federal Reserve Chair Janet Yellen (3), GM CEO Mary Barra (5), IMF Chief Christine Lagarde (6), Brazilian President Dilma Rousseff (7), Facebook COO Sheryl Sandberg (8), YouTube CEO Susan Wojcicki (9) leh US First Lady Michelle Obama (10) te pawh an lang a ni.
(Pic: SBI Chairman Bhattacharya from NDTV)