Ningani chawhnu khan Pu H.Rohluna Minister Geology & Mining chuan Maubuang bula Oil India Limited-in oil an zawnna hmun a tlawh a, an hnathawh dan a enpui.
Oil zawn hna thawktu Oil India Limited-a Geoligist ten an hna thawh dan Minister te hi an lo hrilhfiah a. Lei verh thui zawng tur an tinzawn 4500m ah an verh tawh chu 3945m a ni a, Lei chunglanga lung a chang hle a, an verh chak theih loh phah tih an sawi a, darkar khata 1.21m a chakin khawlin an verh mek a, chhun zan zawmin verh hna hi an thawk a ni. Hna-thawk tu nitin 150 vel an awm reng a, heng zingah hian tualchhung mi 20 chuang an awm bawk.
Oil zawn hna an thawhna-ah hian ni khata company-in an senso chu chawhrualin cheng nuai 14 vel a ni a. Lei verh thui zawng tura an ruahman 4500m hi an verh thlen hunah chuan gas emaw oil emaw hmuh theih an beisei a, gas a awm theih beiseina a lian zawk tih an sawi a. 4500m an verh thlen hunah oil an hmu lo a nih chuan lai chhun-zawm lovin helai hmun hi an chhuahsan mai dawn niin an sawi.
Khawlin lei chhung a verh-naah a verhna bit leh lung innawk chu a sa hle a, Celsius 50/60° te a kai pha a. Hemi sa tak tidai tur hian chirh an siam a, chu chu an kâp lût ṭhin. Lei chhung aṭanga lung nawi an verh chhuahah oil a awm leh awm loh uluk takin an en dik reng a, oil emaw gas emaw an hmuh phawt chuan a awm na chin chu uluk takin an chhinchhiah ang a, engtia zau leh thuka awm nge tih te an hriat theih hnuah a lakchhuah tak tak chu a thawh theih dawn chauh a ni, Oil laihchhuah hi a process a rei avangin laih chhuah a nih atanga kum 7 hnuah chuan a hman theih an beisei thu thawktute hian an sawi bawk.