Zothlifim Logo
Loading ...

Mizo Society of America sâwmnaa USA-a thang mêk Gospel Singer Rosy K.Remsangpuii chu tun thla tawp emaw, thla thar tirah emaw a lo haw beisei a ni.

Rosy-i hian May ni 21 khan Kolkatta aṭangin US a pan a, Kolkata aṭang hian US hi transit nen chuan darkar 22 vel an thlawk tih a sawi a, USA-ah hian Airport-ah parṭhi nen MSA ten an lo hmuak a, May ni 23 leh 24 zanah Chapchakut hmang nghalin, hemi zawh aṭang hian khaw hrang hrang leh state hrang hrangah Gospel concert neiin an zin kual zui nghal a ni.

MSA te hian Mizoram aṭanga Rosy-i an sawm bakah hian Myanmar aṭangin Pantei an sawm bawk a, Pantei hi Love song sa ṭhin ni mahse MSA lam hian Gospel Concert neih an duh deuh si avangin Pantei pawh hian Pathian hla a sa ve zel a, Indianapolis, New York, Buffalo, Des Moines Iowa, Kentucky, Kansas, North Carolina, Nashville, Atlanta Georgia, Missouri, Chicago, West Virginia te an tlawh tawh a, concert an nei nghal zel bawk a, hmun hmingthang engemawzat an tlawh tawh a, Zothlifim-in a biaknaah, “Lalpan rem a tih chuan California Hollywood hmunpui te visit-in, chumi hnu-ah Texas-ah concert kan nei leh ang,” a ti a, chumi zawhah a tawp nan July ni 25/26 vel hian Maryland-ah a ṭum hnihna atan concert an nei leh dawn tih a sawi a ni. Rosy-i hian an concert-naah hian English leh Mizo hla a sa deuh ber a, Lai hla ka sa zeuh zeuh bawk a. Panteii hian Mizo hla leh Kawl hla a sa deuh ber a, ani pawh hian lai hla a sa zeuh bawk a ni.

Rosy-i chuan US Mizo unauten an duat hle tih a sawi a, “Chaw ei sawmtu chhân sen loh kan dawng a, kan mamawh leh duh apiang min tihsak a, kehthei dawm tak meuhin min dawmin min duat a, heng hi Pathian khawngaihna vang liau liau a ni. Pathian leh mite an ṭha em em a, kan lawm hle a ni. Lalpan malsawmna tamtakin vur ṭheuh rawh se,” a ti a, “Mizo zai mi zin tawhah chuan khua in fang zau ber min ti a. Duhsakna kan chang sang hle a ni. Kan lawm takzet,” a ti bawk.

Rosy-i te hi thla khat chauh zaia zin tura sawm an ni a, mahse an visa extend an dilsak avangin an châm hun chhung an pawtsei a, July thla tawpah emaw, August thlatirah emaw rawn haw an tum a ni.

Rosy-i chuan, “Hmunhma ropui leh ram changkang ber kan kal hian ka hmuh chu LAL ISUA bawk a ni. Hmuntinah a ropui zia ka hmu a, Pathianin min khawih thar nasa hle a ni,” tiin Zothlifim-in tisa leh thlarau lama hlâwkna chhar a neih leh neih loh a zawhna a chhâng a, tisa lamah pawh “Khawsak phung leh tihdan ṭha tamtak ka chik ru ve e ka tia. Ka hlawkpui khawp mai. Miten hre ve se tih sawi tur pawh ka ngah khawp mai,” a ti bawk.