North Eastern Council (NEC) sum cheng nuai 234 senna, Sairang-a Bamboo Technology Park chhunga hnathawhah sum sen leh hnathawh inmil thei lo a awm niin Prism chuan an sawi. Hei bakah hian hnathawh zingah siam tura tih leh bill pawh pek thlap tawh, a tak hmuh tur awm si lo a awm niin an sawi bawk.
Sairang-a Bamboo Technology Park hi Prism hruai-tuten an President Vanlalruata hovin tunhnai khan an tlawh a. RTI hmanga information an dil, an dil aṭanga an hmuh danin, hnathawh an tarlan te uluk takin an enfiah a. Hna-thawh an tarlan zingah ‘administrative building’ sak leh tih-changtlunna te, retaining wall te, common toilet te, water reservoir sakna te chu chhuichian a tul hle niin an sawi.
Bamboo Technology Park chhunga infrastructure an siam te chu uluk zawka enkawl a ṭul bakah, repair ngai pawh a tam tawh hle tih Prism thuchhuah chuan a sawi a. He project site chhungah hian scheme dang aṭangin hna an thawk nasa a, infrastructure pawh an din nual a. Heng te pawh hi zirchian leh enfiah a ṭul hlawm hle nia an hriat thu an tarlang.
BTP tuilak hi Rel (train) kawng siamin a tichhe ngei dawna a lan avangin, thuneitu ten ngaihtuahna thar nena hma an lak thuai a ṭul tih an sawi a. Project site chhunga ram ruak zau tak awm hi hmang ṭangkai tura chak taka ruahmanna thar nena hma lak a tul hle a ni, an ti.
Prism hruaituten hehmun an tlawh lai hian electricity power supply a awm lo va, hei hi transformer an intawmpui, a bula awm M/s Mizoram Venus Bamboo Products (P) Ltd in bill an bat hnem lutuk avanga dept-in power an pek duh tawh loh vang niin an sawi.
Mirethei te te pawhin electricity bill tha taka an pek laia, sorkarin neitu nihna tam tak a neihna, mipui sum tam tak senga din Mizoram Venus Bamboo Products (P) Ltd-in bill an pe thei lo chu a mawhphurtu thuneitu tan chuan inenfiah thuai ngai leh siamṭhat nghal ngai ni-ah an ngai tih an thuchhuahah hian an tarlang bawk.