Baptist Church of Mizoram rorelna sâng ber BCM Assembly chuan Ordain Minister te rawngbawlna ni lo sawrkar hna emaw hna dang vuan an awmin an ordination chungchangah kohhranin kal dan tur tihchian an rel.
BCM Assembly vawi 120-na, Hnahthial Bazar BiakIn-a neih mekah Ningani aṭanga Inrinni thleng khan palai 950-in ro an rel a, an thurel zingah ordain minister te, rawngbawlna ni lo hna dang vuan an awmin an ordination chungchangah BCM kal dan tur tihchian ni se tih Aizawl West Area Baptist Church (ABC) atanga thu lut chu pawmin, Administrative Committee in hmalak dan tur lo siam rawh se, tiin thutlukna siam a ni.
Hei bakah hian an thu passed zingah, kohhran member zûk leh hmuam tih chingte’n an sim theih na’n Mizoram Baptist Kohhran hian chak zawkin hma la rawh se tih, Lunglei South ABC aṭanga lut chu ngaihtuah a nih hnuah Social Concern Committee-in lo bawhzui se tiin, Pastor bial tina hmalak tura tih ni rawh se, an ti a. Lunglei South ABC hi pahnihah ṭhen ni rawh se tih te, BCM pumpui hmalakna mek Dialysis khawl leina tur hian tualchhung kohhran tin hian chawlhni zing vawi khat thawhlawm chu bial kaltlangin pek ṭheuh nise, tualchhung Kohhranin bial kaltlangin June thla ral hma ngeiin pek ni rawh se, tih te, BCM pumpui huapin Kohhran fahrah leh harsa zualte tihchangtluna tinghet turin chhawmdawl ni rawh se tih te, Assembly-in thu a lo tihtluk tawh ‘Aizawl ah camping centre din ni se’ tih chu hmalakna ṭan ni tawh se an ti a. Pathianni serh chungchangah hmalak nise, a ṭul dana zirin inkaihhruaina pawh siam ni se tih chu Administration Committee kutah dah a ni.
BCM hnuaiah hian Mission Field & Station – 25 awmin, chung zinga 17 chu Foreign Mission (Partnership) an ni a, Missionary leh Local Worker –1230 Mission Field hrang hrangah an bung mek a, Missionary 16 lak thar an ni bawk. Kum 2015 chhungin ring thar baptisma chang 3,773 awmin, Fellowship 32 leh Kohhran thar 34 din a ni bawk. BCM Assembly hi nizan khan a ṭiak a ni.