Zothlifim Logo
Loading ...

Niminpiaha Kolasib District DISHA Meeting-ah Lok Sabha MP chuan he Meeting-a tel tum Kolasib chanchinbumite chu a chhuahtir a, hemi chungchangah hian Kolasib District MJA chuan an lungawi loh thu sawiin, tunkar chhung hian lungawi lohna an lantir mek a ni.
Democracy ramah hian Media te hi an pawimawh hle a, ram inrelbawlna leh sawrkar kal dik lo tur khalh ngilna kawngah chanvo pawimawh tak an chelh a, sawrkarin a enkawl mipuite tana a hmalakna thehdarhtu an ni a, chutihrualin mipui harsatna te sawrkar hriattirtu an ni bawk a, sawrkar leh mipui inkara palai hna thawktu pawimawh tak an ni.

Sawrkar hmalakna te puangzar turin Information & Public Relations Department chu an awm ngei a, amaherawhchu sawrkar a kal dik loh chang a awm thei a, chutih hunah chuan sawrkar hnuaia thawkte tana sawi chhuah rem lo leh hmalak rem lohnaah chanchinbumiten hma an lak a ṭul châng a awm ṭhin.

Tin, Sawrkar mi ṭhenkhat te hian chanchinbu mite hi an thil hriat zawng zawng mipuite hriat tura puangzar mai ṭhina ngai an awm fo a, hei vanga an hmalakna leh an hnathawhte pawh chanchinbu miten an hria ang tih hlau zek zek pawh an awm thei awm e. Hetianga chanchinbumite kaltlanga mipuite hnena an hmalakna leh an hnathawh puangzar ṭha duh lo te hi chu an hnathawh danah thil dikhlel deuh a awm ni maia ngaih pawh thil awl tak tur a ni.

Tin, chanchinbumite tam tak hian an thil hriat zawng zawng hi mipui hriatah an puangzar lem lo fo a, thil fel lo deuh engemaw a lo awm a nih pawhin mipuiten an hriat avanga mipuiten an ṭangkaipui tur leh mipuiten hlâwkna an hmuh phahna tur ni lo, buaina tipunlun mai maitu ni thei thil te hi chu chanchinbumite hian anmahnia an chinfel mai leh tihdik dan zawn châng an nei fo bawk. Chuvangin chanchinbumite hi mi hlauhawm an ni ngawt bik lo a ni.