Hun engemawchen a reh vang vang hnuah, F.Sanglura chu Mizoram pawn thleng pawha Band lâr Third Sovereign nen a rawn inlar leh dawn ta.
F.Sanglura chuan thlaleh khian Third Sovereign nena Audio Album an siam, hla 8 awmna ‘Inlar leh la’ tih chu a rawn tichhuak leh dawn ta a, he a Album thar tur hi a Birthday, July ni 10 khian tlangzarh a tum a, amaherawhchu function ropui tak nena tlang-zarh a tum lova, a copy pawh siam tam tum lovin, Copy 100 bawr vel chauh siam a tum thu a sawi a, amaherawhchu a copy a siamhoah erawh a Signature a awm vek dawn thung a ni.
F.Sanglura Album thara a hla te hi Slow Rock leh Hard Rock inpawlh a ni dawn a, F.Sanglura chuan a album thar tur chungchang sawiin, “Mizo hlaah chuan he Album anga hla hi a awm lovang” a ti a, a album thara Rimawi siamtu te hi Third Sovereign-a Ruben & Benja te an ni a, Vortex record-a siam a ni.
‘Engtia Third Sovereign nena Album siamdun nge an nih teh tlat?’ tih zawhna chu, “An music play hi ka duh zawng a ni a, kei hi Rock/Thrash Metal lam duh mi ka ni a, kan han sawiho hnuah Album siampui min lo châk ve zia an sawi a, ka hla te Guitar nena sa-in a demo ka pe a, annin a thlûk bo lovin music arrangement an lo siam a, sawi sen ni lo ngaihthlak chi a ni,” tiin a sawi a, tun ṭuma a hla te hi 2/1 vel chauh Music Video-a siam a tum a ni.
F.Sanglura hi PHE Department-ah EE niin, hna lamah a buai hle a, a hunawl neihah a Album hi a buaipui a, tuna a Album tihchhuah tur buaipui nan hian kum 2 vel hun a hmang a, a hna buai tak kara Music a bânsan loh chhan sawiin, “Buaithlak viau ṭhin mahse Zorimawi-ah rimawi chi hrang hrang awm thei se ka duh a, chu chu Mizo rimawi tiphuisutu a ni dawna ka hriat vanga bei ve hram hram ka ni,” a ti a, chhungkuaah pawh chhung-khat pa niin, chhungkuaah harsatna nei ve ṭhin bawk mahse a nupui Jenniferi’n a ṭawiawm ṭhat vang leh hunawl a siamsak ṭhin vanga tun thlenga Music khawvela hnuhma thar la nei thei hram hram a ni tih a sawi bawk.
Tuna Audio Album a tihchhuah tur hi a Pa, F.Lalngura hriatreng nana a buat-saih a ni a, a pa, F.Lalngura hi rimawi khaw-velah mikhual a ni bik lova, kum 1942-1944 vel khan a ṭhiante nen Serkawn Sikul-a an kal laiin Musical Group an siam a, chu chu S&S company a ni a, an ṭhianza ho aṭang hian “Parang a chul kan nun khuarei an chang zo ta” tih hla pawh kha a lo chhuak a ni.
F.Sanglura hian mumal taka Album a tihchhuah hnuhnun ber chu kum 2014-a a ṭhiante nen ‘Chemtatrawta’ tih Album an tihchhuah kha a ni a, khami hnu khan Krismas leh Pathian hla Album a siam a, mahse hei hi chu tlangzarh a ni lo thung a, engtia Pathian Hla Album siam ve teh tlat nge tih zawhna chu, “Ka zai theih lai hian Pathian fakna hla ka nei lovang tih ka hlau khawp asin,” tiin a chhang a ni.
F.Sanglura hi Mizoram rimawi khawvela a tâlna a rei ve ta hle mai a, tun hmaa Rock Band lâr ṭhin Tornado dintute zingah telin, Otto band leh Graveyard-ah te pawh alo tel tawh ṭhin a, tuna a tihchhuah tur Album bakah hian Album dang siam a la tum em tih zawhna chhangin, “Tunah hian ka buaipui leh ṭan tawh a, Pathianin rem a tih chuan ka puitlin ve mai chuan ka ring,” a ti bawk.
Tuna a Album hminga ‘Inlar leh la” tih a hman chhan chu a Music Arrangement hi a fuh a tih vang leh a duhzawng tak a nih vang tih a sawi a, he hla hi a ṭhianpa story aṭanga a siam a ni a, a ṭhianpa hian nula duh deuh mai a nei a, a rim ṭhin a, mahse chu nula chuan midang a neihsan ta daih a, chumi behchhana he hla hi a siamsak a ni a, a thlûk hi siamfuh a intih bakah a thu-in amah ngei pawh a hneh viau tih a sawi bawk.