Zothlifim Logo
Loading ...

Parliament-a Mizote dema Chakma thlavang hauhtu Basawaraj Patil, MP (Rajya Sabha) hnenah MZP chuan nimin khan lehkha a thawn a, Chakma chungchanga a thil sawi a dik loh dan a hrilh.

Nimina MZP thuchhuah chuan, Mizorama Chakma-te hi mikhual an nih thu, Bangladesh aṭanga dan lova rawn lût an nih dan te, Mizoramah awihawm lo khawpa an pun nasat thu te, Chakma Autonomous District Council thiltihtheihna hmanga dik lo taka document an insiamsak ṭhin thu te, chuti chunga a ram neitute an tihbuai ṭhin dan leh dik lo taka Mizote an hêk reng thute MZP chuan Basawaraj Patil, Karnataka aṭanga tling MP hi an hrilh tih an sawi a.

Chakma-in Mizo an puhna te a dik em tih hriat tum hmasa ṭhin tur leh Mizote zâwt chiang hmasa lova aupui mai tawh lo turin MZP chuan MP hi thurâwn a pe tih sawiin, Mizoram hi Mizote tâ a nih thu pawh MP hi hrilh nawn a ni a, ram neitute chanvo midangin an chuhpui a rem loh thu hrilh a ni bawk.

Pi leh pute aṭanga kan rochun, kan ram tihbuai tumtute leh Mizote inpum-khatna tichhe thei thil reng reng an thlahte hian theihtawpin kan do zel dawn tih leh mikhual châm rei, a ram neitute dâwta puh chingte laka ṭhat chhuah reng hi Mizote bat a ni lo tih lo hre turin MZP chuan Basawaraj Patil, MP (Rajya Sabha) a ngen bawk.

Basawaraj Patil, MP (Rajya Sabha) hnena lehkhathawn hi Shri Narendra Modi Prime Minister of India, Chairman Rajya Sabha leh Amit Shah National President Bharatiya Janata Party(BJP) te hnenah a copy hi pek tel a ni tih MZP chuan an sawi bawk a ni.