Nimin khan NLUP Conference Hall-ah Central Young Mizo Association (CYMA) buatsaihin Chief Minister Pu Lal Thanhawla, Dan leh Ruihlo kaihnawih thila Nodal Department Minister leh sawrkar hotu lian te, CYMA hotute leh kohhran hruaitute chu ruihlo vanga Mizoramin harsatna lian tak a tawh mek te engtia hmachhawn zel tur nge tih inrawnkhawmna an nei.
Ruihlo chungchanga inrawnkhawmna hi CYMA President Pu Lalbiakzuala’n a kaihruaiin, inrawnkhawmna hun hawn nan CYMA General Secretary Pu Lalhmachuana’n inrawnkhawmna neih an duh chhan te a sawifiah hnuah CYMA Vice President Pu Vanlaruata’n thlalak leh thu hmangin Mizoram a ruihlo kaihhnawih harsatna, ruihlo ngaite enkawldan leh ruihlo tawlh/zuartute hremna chung-chang a tarlang hmasa a ni.
Sawrkar aiawha rawtna siamtu Chief Minister Pu Lal Thanhawla chuan Mizoram rûntu ruihloin pawi nasa zawk a khawih lohna tura an hun pum hmangtu YMA inpekna leh an hlawhtlinnaah Mizoram mipuite an thlamuan thu leh lawm-awm a tih thu a sawi hmasa a, ruihlo chu dân zawh famkima do theih pawh a nih loh avang-in ruihlo zuartute pawh rei hrem an ni thei lova a rilru nat thlak tak zet a ti a, ruihlo tawlhtute leh zuartute danbeh an nih a hremna na zawk hmachhawntir an nih theih nan dan hremi te leh ukil te pawh hnam rilru puin ruihlo case bikah chuan eizawnna thil pawh ni se kutsil ngam tawh turin Zoram mipui ten kan ngen tak meuh a ni a ti.
Chief Minister chuan heti khawpa ruihlo avanga Mizo-ram a buaina chhanah hian society pawh inbihchian kan ngai tawh niin a sawi a, invenhimna hna thawk turin sawrkar, kohhran leh tlawm-ngai pawlte chu indahâwl bik awmlova, a lungthukim a ṭanho a ngai a ti a. Ruihlo ngaite chhawmdawl a, an nun siamṭha tura tu hnen aṭang maha ṭanpuina phût lo correction home zawng zawng te chu mi ṭhenkhat sawiselna karah pawh hna ṭha thawk chhunzawma, insiamṭhat a ngaihna lai te pawh insiamṭha tura sawmin sawrkarin a thil tih ropui tak te chu sawrkarin a thlawp a ni a ti.
Chief Minister chuan sawrkarin ngaihtuahna thar a siam mek tih a sawi a, ruihloin pawi lian tham zawk a siam lohna turin sawrkar pawhin ruihhlo do puan chu thil sawt zawkah a ngai a nih chuan inrawnkhawm hnuah a puang ang a, hmalak chhunzawm zel dan turah CYMA leh Kohhran thawhpui an ni ang a ti.
Ruihlo kaihnawiha CYMA-in inrawnkhawmna a buatsaih-ah hian Home Minister Pu R.Lalzirliana, Excise & Narcotics Department enkawltu ni bawk, Law Minister Pu Lalsawta, Social Welfare Minister Pu PC Lalthanliana, Health Minister Pu Lal Thanzara, Law Parliamen-tary Secretary Pu KS Thanga, Official te, kohhran hruaitute leh YMA hotu ten an ngaihdan sawiin rawtna an thawh a ni.
CYMA in statistics a lakkhawmin a tarlan dan chuan – kum 1984 aṭanga kumin August thla tir thleng khan ruihlo vanga thi Mizoramah mi 1,456 an awm tawh a, heng zinga mi 156 te chu hmeichhia an ni a. Tun dinhmun ah Mizoram chhunga Home/Centre leh Jail-ah te ruihlo a talbuai mi 2080 lai an awm a. CYMA hnuaia SRS hmalak-na chuan Aizawl khawpuiah ruihlo zuartu man nawn hlawh deuh mi 10 vel an awm tih tarlangin an tan rei loh ṭhin zia te a tarlang a. Tang reilo ber phei chu ni 1 pawh a tang lova, heng zingah hian vawi 6 man nawna vawi 6 tang nawn te pawh an awm a, hetihlai hian Myanmar aṭanga Mizo hnahthlak ruihlo rawn tawlhtu lian lian deuh deuh mi 8 an awm a, kum 2005 aṭang 2017 thlenga YMA in Heroin an man tawh zat chu hawng 752, kg 12 hu a tarlan a ni.