Zothlifim Logo
Loading ...

India Vice President thlan thar M Venkaiah Naidu chuan Zirtawpni khian rinawmna thutiam la in a hna thar a ṭan dawn a, Mohammad Hamid Ansari a thlak dawn a ni.

Inrinnia Vice President inthlannaah M Venkaiah Naidu hian a khingpui Gopal Krishna Gandhi chu vote 272- a hnehin India Vice President 13-na atan thlan tlin a ni a, thlantlin a nih hnua a thusawiah Pu Naidu chuan ram danpui tungding a, he hna lo chelh tawhtu a hmaa mi ropui tak tak a thlak turte hnungzui a tum thu a sawi a. Pu Naidu hi PM Narendra Modi, BJP President Amit Shah, Congress hruaitu Sonia Gandhi leh mi tam takin lawmpuina thu an thawn a, Prime Minister Narendra Modi chuan Vice President ni tura thlan tlin tak hi lawmpuina thu sawiin, ram siamṭhatna kawngah thawh dunna ṭha tak an neih a beisei thu a sawi a ni.

Tuna Vice President ni mek Mr. Mohammad Hamid Ansari chu August ni 10 ah a term a tawp dawn a, M. Venkaiah Naidu hi August ni 11 khian rinawmna thu tiam tir a nemngheh a ni ang.

Vice President thlang thei chin Electoral College ah hian member 787 an awm a, Lok Sabha member 543 awmin, Rajya Sabha member 244 an awm a, Vice President thlannaah hian vote za ah 98.21 a tla in, M Venkaiah Naidu hian vote 516 a hmu a, a khing pui eptu pawl candidate, Mahatma Gandhi tupa Gopal Krishna Gandhi chuan vote 244 a hmu bawk a ni.

M Venkaiah Naidu hi July ni 1, 1949 khan Andhra Pradesh Nellore district-a thingtlang khaw pakhat Chavatapalem-ah a lo piang a. College a kal lai atanga mipui vantlangte hamṭhatna lam ngaiven mi a ni a, loneimite leh mi hnuaihnungte ngaihven zual mi a ni. Hetiang mi a nih avang hian thlalai tak a la nih lai atangin vantlang thil leh politics-ahte a lo inrawlh chho tawh a ni