Zothlifim Logo
Loading ...

Nimin khan MJA Serchhip District Member te chuan Serchhip District Hospital tlawhin, damdawi ina thawktute chu an mamawh leh an harsatna neih te an sawipui.

Nimina Serchhip damdawi in tlawhtute hi District Medical Superintendent Dr. ZD Lalmuanawma leh a thawh-puiten lo dawngsawngin, CMO Conference hall-ah an inkawmhona hun an hmang a, Dr. Muantea chuan tuna Serchhip damdawi in dinhmun sawiin, Serchhip District Hospital-ah chuan khum 50 hman theiha a awm mek thu sawiin, Doctor 14 an awm a, heng zingah hian damdawi ina damlo te enkawltu chu Doctor 8 an nih thu leh Staff Nurse 19, Ward Superintendent 4 leh Nursing Superintendent 1 an awm mek tih a sawi a ni.

District Medical Superintendent chuan tun hnaiah Serchhip damdawi in-ah Doctor ṭha tak tak an awm belh avangin Serchhip damdawi in pantu pawh an pung nasa a, District pawn lam thlengin Serchhip damdawi in pantu an awm a, tunah hian khum indaihlohna pawh a awm tih a sawi a, Doctor an awm ṭhat deuh tawh avangin Aizawl-a refer ṭhin damlo tam tak pawh Serchhip-a enkawl an nih tak avangin thawktute pawh an indaihlo nasa zual tih sawiin, a bikin Nurse an indaih lo nasa zual a, day-off pawh an nei hlei thei lo tih a sawi.

Dr. ZD Lalmuanawma chuan sawrkar hmalakna-in Serchhip damdawi in pawh thuam ṭhat chhoh mek a nih thu a sawi a, khawl thar Colposcope (chhul enna), Endoscope, thisen exam-na khawl hrang hrang, Ha (Dental) lam leh ENT lama hman tur hmarua hrang hrang bakah NEDP atanga lei Ultrasound te an nei thar a, Ultrasound hi hman theih turin Online UPS ngaihtuah mek a ni tih a sawi a, Doctor an awm belh avangin OPD pawh siksawi mek a nih thu sawiin, Naupang OPD chu Eye ward bulah siam mek a nih thu a sawi a, hei bakah hian OPD building chungah Isolation ward siam tum a nih thu leh Cabin pakhat dang siam belh tum mek a nih thu a sawi bawk a, Sawrkar hnuaia Programme hrang hrang te chu damdawi in compound-a an awm a ṭul avang leh damdawi in chu tihlen a harsat si avangin duh angin hmunhma an indaih thei lo tih a sawi bawk.

MJA Serchhip District President Pu C.Lalhminghlua chuan damdawi in an tlawh chhan chu harsatna an neih te ngaithla a, damdawi in pantu mipui hriat tura an duh te zawhfiah bakah damdawi ina thawktute kut tichak tura tih theih an neih te tihsak a nih thu a sawi a, damdawi in-a thawktute chu MJA te an mamawh hun apianga inthla-hrung lova pûr ṭhin tura chahin Doctor thawk mek ten mipui fak an hlawh thu a hrilh bawk

He hunah hian Pu R.Sanghmingthanga Health Staff Welfare Chairman pawhin thusawiin Nurse neih belh tura hma an lak dan te a sawi a, damdawi ina thawktute chuan damlo inkan hun ni lova damlo inkan tum an awm ṭhin te leh damlo bawr hut hut an ni ṭhin te chu mipuiten tilo se an duh thu an sawi a, damdawi in leh a chhehvel vawnfai kawnga thawktuten hma an lak laia mipui lamin ṭanlakpui aia a tibawlhhlawh zawnga an che nasa te chu pawi an tih thu an sawi a, hei bakah hian kalkhawmte chuan damdawi in bula kawngpui kaltlang chu ṭha lo an tih thu an sawi a, kawngpuia lirthei tlan hian boruak a tihchhiat bakah zanrei tak takah thawm bengchheng a awm phah bakah lirthei ring tak taka tlan ṭhin te chuan damlo te tan harsatna a thlen ṭhin tih an sawi bawk.

Inkawmhona an neih zawh hian MJA Member te hi dam-dawi in ward an fanpui an ni.