PRISM chuan Mizorama Administrative District thar siam belh hi tundinhmunah chuan remchang rih lovah an ngai tih sawiin, MLA Inthlanpui dawn boruaka vote zawn nana district thar pe lo turin sawrkar an ngen a, Inthlan chuh tum te pawhin vote zawn nana district thar pek tiam lo turin an ngen bawk a ni.
Nimina Bengvar Inkhawm an neihah PRISM Steering Committee meeting ngaihdan puangin an President Pu Vanlalruata chuan, “Administrative district siam thar leh a awmsa te awmdan ennawn hi ram hmasawnna hnathawh dan te, inrelbawl leh inawpna dinhmun te, mihring pun dan leh venhimna te leh sawrkar hmachhawp mila kalpui tur a ni a. Hun kal tawha vote zawn nana administrative district thar tur puan ten kan ramah buaina tam tak thlen tawhin thisen hial te a chhuak tawh hi PRISM chuan a pawi kan ti a. A thlen nawn kan duh tawh lo a ni,” a ti a.
Pu Vanlalruata chuan sawi chhunzawmin, “Administrative district thar siam hi a hautak em avangin kum 20 deuhthaw kaltaa administrative district 3 kan neih thin 8-a kan tihpun tak zinga a thar 5 te pawh kan sorkar hian tun thlengin an nih tur ang an la nihtir thei lo a. Tun thlenga district pangate anih tur ang an la ni thei lo hi chu tha kan ti lo a, heng district panga te hi tipuitling thuai turin sorkar kan ngen a ni,” a ti a. Tuna kan ram dinhmun atanga thlirin, district thar dang siam belh remchanga an hriat rih loh thu sawiin, “Tuna kan dinhmun atanga thlir hian district thar siam hi remchang kan ti rih lo a ni,” a ti.
Pu Ruata chuan, “Kan sorkar hunah chuan tuna administrative district kan neihsa te hi ennawnin an ramri kan siamtha dawn a. Thuneihna semzai a taka kalpuiin khawpui-ah municipal dinin municipal leh village council te thuneihna nasa tak pein sorkar department 20 atangin mawhphurhna leh thuneihna kan pe dawn a. MLA ten mipui rawngbawl turin an bialah office neiin mipui an thutchilh dawn a. Kawngpui tha neia internet tha kan neih dawn avangin kan ramah hian kilkhawr bik leh development chang ve lo bik kan awm tawh dawn lo a ni,” a ti bawk.
“Kan sorkar hian ramin a mamawhna leh hmasawnnain a nawr vang ni lova vote zawn nana administration khawih thutlukna a lo siam tawh te hi inzir nan kan hman ngei ngei a ngai a. Chuvang chuan MLA Inthlan a lo hnaih leh takah hian vote zawn nana administrative district thar siam lo turin sorkar kan ngen a. Vote zawn nana district thar siam tiam lo turin MLA Inthlan chuh tum zawng zawng kan ngen bawk a ni,” Pu Ruata chuan a ti bawk.
Nimina Bengvar Inkhawm hi General Secretary Pu RL Liantluanga’n kaihruaiin General Secretary Pu C Lalsawmliana’n hunserh a hmang a. Jt. Secretary Pu Lalthuamliana’n activity report a pe a ni.