Zothlifim Logo
Loading ...

India ram chu ram faia siam tuma hmalakna kal zelah Mizoramah pawh Swachh Bharat Mission hnuaiah nasa takin hma lak chhoh ve mek a ni a, faina lamah Mizoram pawhin nasa takin hma kan sawn chhoh phah niin a lang a, thil lawmawm tak a ni a, hetihlai hian hmasawnna tur tam tak kan la nei a ni.

Faina kawnga hma kan sawnna tura thil ṭul tak pakhat chu kan bawlhhlawh te paihna tur bawlhhlawh bawm neih ṭhat hi niin a lang.

Kan khawpui chhung kawtthler ṭhenkhatah bawlhhlawh bawm hûn a ni a, heng te hi a ṭangkai hle a, khawpui hmun lûn lai ṭhenkhatah te mipui veivakten an bawlhhlawh nawi te te an paihna turin kawng dungah a khât tawkin vantlang bawlhhlawh bawm hûn a ni a, heng bawlhhlawh bawm te hian nasa takin bawlhhlawh bâwm hûnna bul vel hnawk tur a vêng a, hei hi faina kawnga hmalakna ṭangkai tak a ni.

Mizote hi kal paha thil ei ching kan ni a, kan kuhva panhnah nawi te, meizial bung te, thil dang eina kawr te leh bawlhhlawh nawi dang te pawh kalpahin kan insiam fo a, heng bawlhhlawh te hi a paihna tur bawlhhlawh hmuh loha ak ṭha mai duh hi chu mi tlemte chauh kan la ni a, bawlhhlawh kan insiam chawp te hi bawlhhlawh bawm hmuh loh pawhin kan bul vela paih mai ching kan la nih avangin kan hmun lûn laia vantlang bawlhhlawh bâwm hûn hi kan khawpui vawnfaina atan thil ṭangkai tak a ni a.

Chuvangin kan khawpui te vawnfai kawnga hma kan sawnna tur chuan kan khawpui kawtthler hrang hrangah hian vantlang bawlhhlawh bawm tam zawk hûn dan tur ngaihtuah hi thil ṭul tak niin a lang.