Zothlifim Logo
Loading ...

Nimin khan Raj Bhavan-ah Mizoram Governor Lt. Gen (Retd) Nirbhay Sharma kaihhruaina hnuai-ah Healthy Mizoram Campaign leh Project HIMNA-MADAT chung-chang sawihona neih a ni a. Meeting-ah hian Chief Minister Pu Lal Thanhawla, Chief Secretary Pu Lalmalsawma te pawh an tel a ni.

Meeting kaihruaitu Governor chuan Mizoram chuan theihna leh thiamna nasa tak nei chunga hriselna lam kawnga harsatna a tawk fo chu a ngaimawh thu a sawi a, khawtlang siamṭhatna turin kohhran, NGO, sawrkar leh pawl hrang hrangte rim taka an thawk chung pawha ruihhlo a hluar zel chu a vei thu sawiin hemi tireha nuaibo tur chuan kan zavaia inthuruala thawhho a ngai a ni, a ti a, ṭhalai, nakin lawka ram hmel lanna turte chhanchhuak tur chuan a hmasa berah ruihhlo chi tinreng te lo awm chhan chhuia tihrêm a ngai a, hemi tur hian chhungtin, khawtlang leh State pum huap thlenga thawhho a ngai a ni a ti a, mipui nawlpuiin ruihhlo – zu, damdawi leh vaihhlo leh a kaihhnawih chungchanga hriatna zau zawk an neih theih nana inhrilhhriat-na neih chu tun aia nasa zawka kalpui a ṭul thu a sawi a, Mizoram hriselna atana mitinte thawhho angai a ni, a ti.

He hunah hian Chief Minister pawhin thu sawiin Mizo-ram hrisel leh nuam zawk neih theihna tura Assam Rifles, Pro-ject HIMNA-MADAT buaipui-tu te, Line Department hrang hrangte, Kohhran leh NGO te thawhhona chu fakawm tiin, Mizoram chu drugs leh thil dang dân lo anga tawlhrûkna kawng a nih avangin fimkhur a ngai hle a ni, a ti a, Dan loa thil tawlhru-tute man chhuaha an phu ang ngeia hremna pêk chu thil tih makmawh a ni, a ti a, hemi chungchang hi dan hremi leh thuneitute nena sawiho a ngaih thu a tarlang bawk a ni.

Healthy Mizoram Campaign hi kumin June ni 21 khan International Yoga Day hmanna AR Ground a neihah khan Mizoram Governor hian a hawng a, hei hian nakum June ni 21, 2018 thleng a huam dawn a, hemi programme hnuaiah hian Yoga, Health, Healing, Naturopathy, Neurotherapy leh Drug rehabilitation-ah te hmalak a ni a. Mipui hrisel zawk nan Assam Rifles te chuan Mizoram mipuite a thawhpui zel an tum thu tarlan a ni. Assam Rifles hmalak nain Mizoram hmun hrang hrang-ah Medical Camp, Friendly Sports match, First Aid Course, Trainer te zirtirna pek leh hriselna lama ni pawimawhte a huhoa lawmna hun te buatsaih a ni tawh a ni.

Project HIMNA-MADAT (Mizoram Against Drugs, Alcohol and Tobacco) hi New Economic Development Policy (NEDP) hnuaia Aizawl DC Pilot Project niin ,ruihtheih thil laka ṭhalaite, a bik takin Upper Primary chung lamte an hima an fihlim theihna tura ruahmanna a ni a, a enchhin nan Aizawl District chhunga school thlan bikah kalpui mek a ni a, he Project hi June ni 21, 2017 khan I&PR Auditorium- ah Chief Minster Pu Lal Thanhawla’n a hawng a ni.

He project hmalakna zingah hian School naupangte hnena ruihtheih thilin a nghawng thil ṭhalo te inhrilh-hriatna neih te, Anti-Tobacco/ Anti-Drugs Abuse Club School-a din te, Art Compettition buatsaih te, Pamplet, poster, sticker leh Complaint Board siam te, public education Campaign buatsaih te, Zirna in bulhnaia vaihlo leh ruihtheih thil dang zawrh phallo tura hmalak te , zirtirtu leh zirlai naupang nu leh pate vaihlo leh ruihhlo dang laka fihlim thei tura hmalak te a tel a ni.

Meeting-ah hian Assam Rifles, H&FW Department, Education Department, Social Welfare Department, SCERT, MSACS, MSTCS leh Aizawl DC Office lam aiawhte an tel a ni.