Zothlifim Logo
Loading ...

Nimin khan MZP rorelna sâng Federal Council Sitting chu MZP Conference Hall, MZP Pisapui -ah neih a ni.

He hun hi Pu B.Vanlalṭana Vice President-in kaihruaiin, Pu L.Ramdinliana Renthlei General Secretary hnen aṭangin Pawl hmalakna hrang hrang report ngaihthlak a ni a, MZP federal Council sitting-ah hian Mizoram hmun hrang hrang aṭangin rorel palai thahnem tak an tel a ni.

He huna hian Pu Lalsang-zuala Ngente President chuan thusawiin, “MZP member tlang hrang hrang a mite kan thawhhona a ṭha hle a, zirlaite leh ram leh hnam tan thawkho zel ila, kan hmalakna te kan inthlawp tlat zel a ngai a. Tlang hrang hrang kan hruaitu ten kan zirlai member chawimawi phu an awm a kan chawimawi ṭhin hi a ṭha hle a, hetiang ang chawimawi phu leh chawimawi ngai an awm chuan chawimawi chhunzawm zel turin ka chah duh che u a ni,”a ti.

MZP rorelna sang federal Council sitting-ah hian MZP Assembly 2017 ni 24 October 2017 – a neih tur atan agenda 6 pawm a ni a, Agenda pawm te chu – “Kum 2018 chhungin Zo-Hnam inkhawmpui lian ZOFEST neih leh ni rawh se” tih te, “Bangladesh aṭanga Mizoram chhunga dan lova foreigner lo lût te thawn haw an nih theih nan hmalak ni rawh se” tih te, “Registrar birth & death hi Chakma khuaah a khawihtute Chakma vek an nih ṭhin avangin ram leh hnam tan a him lo hle a, fimkhur taka kalpui turin sawrkarah thlen ni rawh se,” tih te, “Mizoram hmun hrang hrangah zirtirtu in daih lohna hre renga, tuna zirtirtu sawrkarin lak an tum mek hi rang taka lak a nih a, zirtirtu indaih lohna school leh college-ah zirtirtu dah a nih thuai theih nan MZP-in hma la rawh se,” tih te, “Media kaltlang-in Zo Nationalism lam hawi inzirtirna uar leh zuala neih ṭhin ni rawh se” tih te, “Mizoram chhunga Mikhual chamrei Chakma leh Tuikuk chetvel dan buaipuitu tur sub-commitee MZP General Headquarters in din rawh se,” tih te a ni.

MZP federal Council sitting rorel chuan Mizoram University (MZU)-in Vice Chancellor nghet a neih loh avanga VC nghet nei tura hma an lak mek chu MZP-in an thlawp thu resolution a siam a ni.