Zothlifim Logo
Loading ...

Nilaini khan Tipaimukh Tuikhuah-in a tihbuai tur Mizoram leh Manipur-a khaw hrang hrang mipui inhlawmkhawm, ‘Affected Poples Association of Tipaimukh Dam'(APA) chuan Khawpuar-ah General Assembly neiin, Tipaimukh Dam chu an dodal zel tur thu an puang.

He Assembly-ah hian Mizoram leh Manipur-a khaw hrang hrang mipui an kalkhawm a,  a. Resolution 3 an passed, an resolution pass-ah chuan “Tipaimukh Dam hi kan duh lo a, kan duhlohna hi sawrkar leh thuneituten min lo pawmsak turin kan ngen e,” tih te, “Tipaimukh dam hi hma lak luih zel a nih chuan, keini Affected Peoples Association chuan theihtawp chhuahin kan dodal zel dawn” tih leh “He kan hmalakna ah hian min thlawp tlat turin mipui leh NGO te min thlawp tlat turin kan sawm che u a, he project dodal zawng a hmalakna reng reng kan thlawp tlat a ni,” tih te a ni.

He Assembly-ah hian Tipaimukh Dam khuah a nih theih nana clearance hrang hrang lakna turah mipui ngaihdan dik tak lak a nih loh thu tarlan a ni a. Environmental clearance neih a nih theih nana hemi huamchhunga VC hrang hrang ten remtihna an sign chungchangah pawh VC-te hi he tuikhuahin a chim chin tur leh a ṭhat lohna lam pakhatmah sawipui an ni lo niin sawi a ni bawk a. Ni 1.12.2004 a Darlawna Public Hearing neihna a mipui ten an duh loh thu an sawi pawhin ngaihpawimawh a hlawh loh thu an sawi a. He tuikhuah hian hmakhawsang atanga an lo khawsak tawhna leh an eizawnna hmun, tihluihna hmanga sorkarin laksak a tum chu an duh loh thu leh khawvel leh India rama dikna dan palzutna niin an sawi bawk a ni.

He Assembly hmanpuitu bialtu MLA Pu Lalpianmawia, Dy. Govt. Chief Whip pawhin VC a nih lai ngeiin he project thlawp zawng hian hming a lo sign tawh tih sawiin, hming an sign dawn hian he project-in a chim chin tur leh a ṭhat lohna engmah sawilan a ni lo tih a sawi bawk a ni.

Tipaimukh dam hi Tuiruang leh Tuivai infinna aṭang khuah tur niin, Megawatt 1500 pechhuak thei tura ruahman a ni a. He project atana sum ruahman pawh hi Rs. vaibelchhe 9000 zet a ni a. Hetih lai hian a chim chin tur chungchang pawh tun thlengin sawi chian a la awm lova, report hrang hrangah a la inanglo nasa hle niin thudawnna chuan a sawi.