MPCC-in CM inrawlha puhna an chhâng lêt
Mizoram University-a Vice Chancellor nghet dah phuta lungawilohna lantirna chhunzawm mek a ni a, nimin khan Higher & Technical Education Commissioner Pu Benjamina leh Mizoram University Students’ Council leh Aizawl City College Joint Students’ Union aiawh te chuan Governor Pu Nirbhar Sharma chu Raj Bhavan-ah an hmu a, MZU-a Vice Chancellor nghet awm loh avanga thil awmdan te an sawipui.
Governor chuan zirlaite harsatna chu a hriatthiampui thu sawiin, sawrkar laipuiah vawi engemawzât a lo thlen tawh thu a sawi a, sawrkar laipui pawhin a ngai pawimawh in, chingfel tura hma a lâk mek thu a sawi a ni. Hemi hma hian an zirlaite chu thlahthlam lo turin a chah a, Vice Chancellor nghet an neih loh avanga a bik taka harsatna an tawh te chu amah hriattir turin a chah a ni. Acting Vice Chancellor-in hna mumal zawka a thawh theih nan ṭawiawm ṭha turin a chah bawk a, University an kal chhan te hre reng a, an zirlai tiṭhuanawp zawnga awm lo turin a ngen a ni.
Zirlai aiawh te hian memorandum Governor hnenah an thehlut nghal a ni.
Hetihlai hian, MPCC Mizoram University-a Vice Chancellor dah chungchanga Mizoram BJP Unit President Pu JV Hluna’n Chief Minister Pu Lal Thanhawla inrawlhin a mi duhzawng dah a duh vanga tihkhawtlai a ni tia a sawi chungchang chhângin nimin khan thuchhuah a siam a, he puhna hi thu diklo a ni a ti.
MZU Vice-Chancellor thar tur ruat chungchangah hian Search Committee chuan a thlan chhuah mi 12-te chu kumin April 23 khan India International Centre, New Delhi-ah a ko a, he a kohnaa kallo Professor R.V. Tiwari, Skype/Video Call hmanga interview hmachhawn chu duhthlan tur mi 3 a thlan chhuah zingah a tel tih sawiin, hei hi induhsakna uchuak tak thil anga a lan avangin Chief Minister chuan President leh Prime Minister te hnenah lehkha-thawn thawnin Search Committee thil tih dan chu nasa takin a sawisel a, lehkha-thawnah hian Chief Minister chuan tumah mimal hming a sawi lang lova, induhsakna uchuak avangin dan palzutna awm chu sawisel mai chauh zawk a ni, tih an thuchhuahah chuan an tarlang.