Serchhip Sub-Hqrs. YMA hnuaia Education and Youth Affairs Committee leh RUSA, Govt. Serchhip College ṭang-kawp huaihawtin nimin khan Joint YMA Hall, Thenzawl Bazar Vengah Education Campaign neih a ni a, Thenzawl khawchhunga Higher Secondary School leh High School zirlai leh zirtirtute, Primary leh Middle School Headmaster te he hunah hian an kal a ni.
Education Campaign programme hi Education & Youth Affairss (EYA) Committee, Serchhip Sub-Hqrs. YMA Chairman Pu C.Lalramliana’n kaihruaiin, Resource Person atan District Education Officer (DEO) Pu Lawmawma leh Govt. Serchhip College-a Asst. Professor Pu Laldingluaia Khiangte te hman an ni a, anni pahnih bakah hian Serchhip Sub-Hqrs. YMA Secretary, DIET Serchhip Principal ni bawk Pu Lalrammawia leh PHE Department Serchhip aṭangin Co-ordinator, SBM(G) Tv. Samuel Lallawmzuala ten thu an sawi bawk a ni.
Thusawitute chuan Mizorama Mizo zirlaite zirna kawnga harh thar a ṭul thu te, Central Service-a Mizo lut kan tlem ta lutuk chu kan hnam tan a pawi thu leh vai chu sawi loh, Mizorama Chakma te pawh kan tluk mang tawh lo nia a lan thute sawiin, zirna kawnga harh tharna Mizo ten kan chan a pawimawh tak zet thu uar takin an sawi a ni.
YMA General Conference 2016 rorel thu pass Central YMA- in a bawhzuina anga Education Campaign hi neih a ni a, tun thla ni 15 khan North Vanlaiphaiah neih a ni tawh a, Biate, East Lungdar, Chhingchhip leh Serchhipah te la neih tura ruahman niin, Education Campaign-ah Sub Hqrs YMA hi DEO bakah, PHE Department Swachh Bharat (Gramin) leh RUSA Govt Serchhip College te puihnaa neih niin, a tum ber chu Central leh Civil Service-a Mizo a tam thei ang ber an luh theihna tura beihpui thlakna a ni.