Mizoram State Aids Control Society chhinchhiah danin, kum 1990 atanga kumin March thla thleng khan Mizorama thisen endik tawh 6,05,119 aṭangin HIV hrik pai 14,632 hmuchhuah a ni tawh a, kum 15 leh 24 inkarah HIV vei an pung chak ber a, tunah hian kum 25 leh 40 inkarah HIV/AIDS vei an tam ber.
He thu hi MSACS Project Director Dr. Lalmalsawmi Sailo in a office-ah chanchin thar thehdarhtute nimin khan a hrilh a, HIV vei zinga mi 10,632 chu ART Center-ah an inziak lut a, ART damdawi ei mek mi 7,067 awmin, AIDS vanga thi mi 1,444 an awm tawh a ni. ART damdawi ei mek zinga za a 52 chu nupui pasal nei lai an ni, a ti.
Ruihhlo hmangtu, damdawia inchiu ṭhinten HIV an thehdarh loh nana syringe and needle exchange programme an kalpui chu damdawi ti zel tura fuihna ni lovin, HIV an put darh loh nana hriau thianghlim chauh an hman theihna tura duan a nih thu leh mipat hmeichhiatna hmang lo thei lote Condom hmang tura an zirtir pawh mipat hmeichhiatna hmang tura fuihna lam ni lovin, natna tha lo laka an fihlim theihna tura tih a nih thu Dr. Lalmalsawmi chuan a sawi a. Mizoramah HIV/AIDS-in bu a khuar mek avangin mutmawh hnarmawha neih a tul tawh takzet tih a sawi a. Do let a nih lohva tun ang zela a hluar chho a nih chuan eng ang pawhin hma lak ni mahse ram leh hnam humhalhna tluantling a awm theih a beiseiawm lo, a ti a. Chhungkaw tinah HIV hlauhawmzia chu uar zawka inzirtir thar a tul a, hemi atana hmalaknaah Kohhran chu a thawhhlawk thei ber tur a ni, a ti bawk.
Damdawi hmang thinten an sim theih nan kum 2009 atang khan oral substitute therapry (OST) kalpui a nih thu leh damdawi hi a thlâwna pek a nih avangin damdawi hmang thinte chuan OST damdawi hi ei vek thei se a duh thu MSACS Project Diector chuan a sawi a ni.