Nimin khan Students’ Self-Support Union (SSU) chuan General Assembly vawi 32-na, Chanmari YMA Hall, Aizawl-ah an hmang a, he hun hi Pu R.Lalzirliana, Home Minister chuan khuallian niin a hmanpui a, Pu Robert Romawia Royte, Chief Managing director, NECS chu khual zahawm a ni.
He hunah hian PC Lalramengmawia, President chuan zirlaite fuihna thu sawiin, “SSU hi mahni intodelh pawl kan nih angin donation kan khawn dawnlo a, tunlai mipa thi kan tam lutuk hi in enfih a ṭul takzet a ni,” a ti.
He hunah hian zirlai, an zirna atana mahni intodelh thlan chhuahte hnenah chawimawina (Self-Support Award 2017) hlan an ni a, he Award hian Citation leh pawisa fai Rs.10,000/- a kengtel a, Award hi Laltlankima (Govt. Aizawl North College), Jeny Lalnunfeli (Govt. Aizawl North College) leh Francis H.Lallungmuana (Govt. Hrangbana College) te hnenah hlan a ni.
Khuallian Pu R.Lalzirliana chuan thusawiin zirlaite chu thawkrim tur leh thawhrimna tello hlawhtlinna chu a nghetlo a, thawkrim chunga hlawhtling turin leh nu leh pa thuawiha thawhreh neilo tur leh Pathiana innghat tlat turin zirlai kal khawm te a fuih a, khual-zahawm Pu Robert Romawia Royte pawhin thu a sawi bawk.
Chawhnu lamah ‘Vangpui Kut’ hmangin Pu Lalnghing-lova Hmar, Honorary Secretary, MFA chu ‘Kut Pa’ atan hman a ni.