Kaladan Multi Modal Transit Transport Project hnuaia Lawngtlai aṭanga Myanmar pawh tura kawngpui laih mek chu zawh hun tura ruahman, nakumah thawh zawh hman a beiseiawm loh.
Multi Modal kawngpui laih mek enkawltu Mizoram PWD Sr. EE Pu C.Lalhumhima sawi dan chuan kawngpui sial hna thawktuten harsatna hrang hrang an tawk ṭhin a, Zangnadawmna phût vanga ram neitute’n kilometer 1.80 chu laih an phal loh avangin Contractor ten hna an thawk thei lova, Myanmar ramri hnaih ber khua Zochachhuah-ah chenna In 29 chu ṭhiah a ngai a, In neitute hian ṭhiah an remtih loh avangin kawng hi sial tlang theih a la ni lo bawk.
Kawngpui hi KM 87.180 a sei tur a ni a, Lei 8 dawh a ngai dawn a, Lei dawh dan tur hi Ministry of Road Transport & Highway phût angin IIT, Gauhati-ah endik turin thawn a ni tawh a, IIT, Gauhati hian kumin September ni 14 khan an zo fel a, tluang taka hna kalpui a nih pawhin Lei dawh chhung tur nena chhûtin nakum khi chuan helai kawngpui hi a nih dan tur ang tak chuan zawh fel hman a nih a beiseiawm loh thu a sawi.
Fur ruahtui tam ber lai pawhin he lai kawngpui sialtu Company pahnih – RDS Project Limited leh Atlanta ARSS Infrastructure te chuan hna an thawk reng a, hnathawh erawh a sawt lo viau tih kawng enkawltute chuan an sawi a, mi ṭhenkhatin kawngpui laih tawhsa chu thing kih hnana thing zai mai te an ching a, kawng tihchhiat pawh an nei nual tih an sawi bawk.
Multi Modal Transit Transport Project kawngpui sial mek hi KM 85.38 laih zawh tawh a ni a, KM 44.50 chu Blacktop a ni tawh a ni.