Zirlaite’n an kal leh zelna tur kawng an hriat theih nana inkawhhmuhna hun Edufest vawi 16-na chu nimin khan Assembly Annex basement-ah Mizoram Journalists’ Association President Pu Zonunsanga Khiangte in a hawng.
MJA President chuan Edufest kaltlang hian zirlai tam takin senso tlem zawkin zirna in ṭha tak takah seat an lo hmu tawh ṭhin tih a sawi a. Tun ṭumah pawh zirlai leh ṭhalaiten he Edufest hi an chhawr tangkai leh ngei a ring tih a sawi.
Zalen leh Lynchpin buat-saih Edufest-ah hian zirna in hrang hrang – India ram chhung leh ram pawn aṭangte bakah bank officer zir theihna kawng inhawn dan leh educational loan chungchangah bank pahnih – Mizoram Cooperative Apex Bank Ltd. leh Mizoram Rural Bank ten stall an hawng a, a vaiin stall 18 hawn a ni a. Heng zingah hian Singapore aṭangin institution pahnih leh Canada aṭangin institution pakhat an tel a ni.
Edufest buatsaihtute chuan tun ṭumah hian phai lam college leh university chung-chang information hrang hrang zawh theih a ni tih an sawi a. Scholarship, students loan, admission leh a dangte course hrang hrang a awm tih an sawi a ni.
16th Edufest hi a nikhatnaah hian zirlai leh zirlai nu leh pa engemawzatin an tlawh a. Vawiin chawhma dar 11 aṭanga tlai dar 5 thleng neih zawm a ni ang.