Zothlifim Logo
Loading ...

School Education Minister Lalchhandama Ralte chuan sawrkar tharin party dangte pawh a kalkan lovang, a ti.

He thu hi nimina Kawnpui MNF-in sawrkar thar lawmna Awithangpa Hall, Kawnpuia an buatsaiha hmanpuinaah sawiin, Lalchhandama Ralte chuan he sawrkar hi party mal sawrkar a ni mai lo, mitin huap a ni. Sawrkar thar hian party dang pawh nise a kalkan dawn lova, tu party pawh nise, hmeithai leh pachhia te kalkân nghauh nghauh kan remti dawn lo a ti. Sawrkar hnathawkte pawh khawtlang tana hmasawnna a kal tha em tih lo thlithlaia thurawn pe fo turte, a ṭul chuan party worker te pawh sawihopui ṭhin turin a sawm a. Sawrkar dik, felfai, langtlang, inthliarna awm lo nih he sawrkar thar hian a tum tih a sawi bawk.

Minister chuan Mipuite hnena an aupui angin zu khap a ni dawn a, thisen man lak te pawh tih tawp nghal a ni a ti a. Education ah pawh SSA leh RMSA zirtirtu thla 3 hlawh pek loh chu pek chhuah nghal an ni a, 7th pay la hmu ve lo te pawh January 2019 aṭanga la turin pek nghal an ni a, sikul ṭan hun pawh khawtlang nunphung milin zing dar 9 a ṭan turin thu tihtluk a ni a, engemaw avanga ṭan hma ngai an awm a nih chuan sawrkarah dil theih a ni ang a ti bawk.

Minister chuan Zirnaah hian zirtirtu indaih lohna a nasa a, zirtirtu pension leh thi post ruak 2300 chuang a awm a, chowkidar leh peon, LDC post ruak engemawzat a awm bawk. Heng post ruak kan neihte hi hnawhkhat turin ruahmanna kalpui mek a ni a, a theih chin chinah a khaw mite duhsak an ni ang a ti bawk.

Minister chuan SEDP kalpui nan sawrkarin budget session hmasaah sum a dah dawn a, kut hnathawktute khaichhuahna tur a ni tih hria a, a nih dan anga hman tum tur leh rinawm taka tihlawhtling turin kalkawmte chu a sawm bawk. Sorkar thar chu a neitu apiang, a thawk tam apiang dinchanna tur a ni tih hriaa neitu rilru pu theuh turin mipuite chu a sawm bawk.

Kawnpuia sawrkar thar lawmnaah hian Minister hi K.Laldawngliana chairman MIZOFED leh MNF Gen Hqrs hruaitu ṭhenkhatin an ṭawiawm a, Kawnpuia sawrkar hnathawk te leh party mi ṭhahnem tak an kalkawm a ni.