Zothlifim Logo
Loading ...

Tunhnaia Mizoram chhim lama India sipai engemawzat an kal hnua India leh Myanmar ramri a ralmuang lo anga sawi chu thudik tawk lo niin Zothlifim chuan thu kan dawng.

Nimina India leh Myanmar ramri dinhmun hre tura ramri a hmuna tlawhtu Lalngheta Ralte, Accredited Journalist, Lawngtlai kan biak pawhna aṭanga thu kan dawn danin, ramri-ah hian inkahna thleng hnai tur angin India sipai te hian inbuatsaihna an nei lo nia hriat a nih thu a sawi a, indo tura sipai an inpuah-chah chuan damdawi lam te leh ei leh in tur te inchhawp lâwk ṭhin a ni a, tun dinhmunah chuan sipai te awmna hmunah hetiang thil hi inchhawp lâwk a awm lo tih a sawi.

Hei bakah hian chhim lam khuaa Curfew puang anga social media-a thu vawrh darh chu a dik tawk lo tih sawiin, ramri depah India sipai ten nunchan an zir avangin, helai hnaih khua Vaṭhuampui Laitlang leh Zochachhuah mipuite chu an sahimna tur ngaihtuah a nih avangin ramri lama ramchhuak lo tura hriattir an ni thung tih sawiin, heng khaw mipui te hian harsatna an tawk lo tih a hmuh thu a sawi a, hetihlai hian nitin eichawp zawnga ramvak ṭhin te an nih avang erawhchu sipai te nunchan zir hun chhung a rei chuan harsatna an tawh theih thu khawtlang hruaituten an hrilh niin a sawi a ni.

Ramri depa sipai nunchan zir hun chhung tur hi thuneitute lam aṭangin a hriat theih rih lova, Assam Rifles hotute erawh chuan khawtlang ko khawmin, nimin aṭanga ramchhuah khap a nih thu hi mipui an hrilh a, khawchhung leh lamhnaia vahchhuah erawh khap lovin, mipuite pawh zalen takin an khawsa thung a, hetihlai hian Mizoram Police te pawhin, sipai nun chan zirna hnaih lamah harsatna a thleng nge thleng lo tih an thlithlai ve reng bawk a ni.

Nimina Lalngheta Ralte-in a tlawh hmun Vaṭhuampui Laitlang leh Zochachhuah te hi nikum hmasa lamah pawh Myanmar aṭanga raltlang engemawzat an lo luhna leh Assam Rifles-ten awmhmun an khuarna sa a ni a, thudawnna chuan sipai chetvel dan diak diak hi chu hriat theih a nih loh thu a sawi bawk.