Zothlifim Logo
Loading ...

Mizote Kût neih zinga hlimawm leh mite hlut ber Chapchar Kut ni 2-na chu nimin khan Mizoram hmun hrang hrangah hlim taka hman a ni a, Serchhip-ah pawh Leisekawt Mual-ah Chapchar Kût hi hman a ni a, District Bawrhsap Sangchhin Chinzah chu Kût Nu a ni a, VL Remliana, Project Director, DRDA, Serchhip District chu Kût Thlengtu a ni.

Kût thlengtu VL Remliana chuan hun tantirah kalkawm mipuite lawmna thusawiin, Serchhip mipui zawng zawngte hlim ni, lungrual leh inngeih tlang taka kût ni ni turin a thleng tih a sawi a, Kût Nu Sangchhin Chinzah chuan kût hi a hawng a ni.

He hunah hian MUP Sub-Headquarters, Serchhip-ten hlado chhamin tlang an tlir a, chumi hnuah Branch YMA 20 ten Cheraw kânin, MZI Ser-chhip-ten zaiin mipui an awi a, Branch hrang hrang YMA chhang ten Tlang lâm an entir a ni. Hei bakah hian MHIP lamin pâr lam an entir a, Branch YMA hrang hrang-ten a ruala Sarlamkai an entir bakah zaithiam leh lam thiam ten hun an hmang bawk.

Chapchar Kût hmannaah hian MUP ten thiamhnang deh lam thil entirna hmun leh MHIP ten la deh lam thil entirna hmun an buatsaih a, Chanmari Branch YMA-ten Thingpui-sen leh Kurtai, kût chhimtu a duh apiang tan an buatsaih bawk a ni.

Chawhnu lamah Music Concert neih chhunzawm a ni a, zaithiam hrang hrangten mipui an awi a ni.

Chapchar Kut 2019 pual hian Miss Chapchar thlanna Serchhip Photographer Association ten an nei a, Chapchar Kut Miss atan hian Lalthlamuankimi, P&E Branch YMA chu thlan a ni.