Cheng vaibelchhe 13.64 senga thawh mek Biate khaw tui lâkna tur, Biate Water Supply Scheme (Pumping) chu nimin khan a enkawltu PHED, Serchhip WATSAN Division hotute leh he hna thawktu contractor-ten an enchhin.
Nimin khan pump set pakhat ṭheuh te pump house hmun pahnih aṭangin hlawh-tling taka trial run neih a ni a, Tuipui lui aṭangin Biate khaw hnuai Sesik Peng Kawn bulah tui pump chhoh a ni a, Sesik Peng Kawn bula Pump House No-2 aṭangin Biate khaw chunga Chawngdawla School hmun Main Reservoir-ah tui hi pump chhuah a ni.
He trial run hi Contractor H.Sanga leh E.Lungdar PHED SDO, Samuel LR Ralte leh PHED E.Lungdar JE, V.Lal-vuana-ten a huhovin an nei a, he trial run enpui tur hian YMA leh VC aiawh Biate aṭangin sawm an ni bawk a ni.
Pump set pakhat hian darkar khatah tui 20,000 litre zel an pump chhuak thei a, Biate WSS (Pumping) hna pumpui hi 70% thawh zawh tawh a ni.
Biate WSS (Pumping) hi NERDP hnuai aṭanga Sanction hmuh niin, he Scheme hi thawh zawh a nih hunah chuan Biate khua chhungkaw tinin tui connection neiin, nitin mi pakhatin tui 135 litre dawng thei tura ruahman a ni.