Chanchinthar Mizoram

Sakawrtuichhun khawtlang leh Police innawrnaah mi 1 hliam

Tunkar Thawhtanni zing dar 5:30 vela Phunchawng Mel 6-a Pioneer Camp bul kawr-a Sakawrtuichhun veng mi pahnih, Lalringliana (47) leh Rochungnunga (61) te thichhawnga hmuh a nih hnu boruak kal zelah nimin khan Phunchangah buaina a chhuak a, Police leh Sakawrtuichhun khawtlang pungkhawm innawr buainaah mi pakhatin hliam a tuar a, boruak ṭang lutuk erawh hmehmih a ni tawh.

Thichhawnga hmuh zingah Lalringliana chu damdawiin panpui tum a nih mek laiin a hliam tuarlo in a boral a, Rochungnunga pawh hi tun dinhmunah a dinhmun a ṭha vaklo ni a thudawn a ni.

Police lam sawi danin, an pahnih hian mi kuttuar ngei nia hriat a nih hnuah Phunchawnga tleirawl 3 te tih nia hriat a ni a, heng mi 3 – Lalchawisanga, Malsawmkima leh Vanlalluaia kum 18 mi vek te chu man tawh niin an inpuang tawh nia hriat a ni a, hemi avanga Sakawrtuichhun khawtlang ṭhalaite thinrim kal zelah buaina hi chhuakin Police te hian Phunchawng hi awmchilhin an veng zui mek a ni.

Sakawrtuichhun Branch YMA hruaitute sawi danin Lalringliana leh Rochungnunga te hian zan dar 10 hnulam hret khan Phunchawng hi an pan niin hriat a ni a, nimin zing dar 5:30 vel khan pioneer camp bul nalaah hliam nasa tak tuarin hmuh an ni a.Hmuh an nih hlim hian hliam an tawrh nasat avang leh an hmaite vun nasat avangin tute nge an nih tih Phunchawng khawtlang hruaitute chuan an chian mai thei lova, Sakawrtuichhun khawtlang hruaitute punin, hemi hnu hian tute nge an nih hriatchian theih a ni ta chauh a ni.

Hetianga an vengpa pahnih hliam nasa tak tuara hmuh an nih thu leh thihna hial a thlen takah chuan Sakawrtuichhun khawtlang ṭhalaite motor trip 3 vel chuan Phunchawng Mel 6 hi an pankhawm nghal a, boruak pawh a sosang hman viau a, nimahsela, hliam an tawrh dan leh mi kutthlak an ni ngei em tih engmah chian hleih theih a nih tak loh avang leh Sakawrtuichhun khawtlang hruaituten boruak dai zawnga hma an lak avangin boruak duhawmlo thleng zui a awm lova, hemi hnu hian Police ten heng mi 3 te hi an man hnua an inpuan takah hian nimin khan sakawrtuichhuan mi 200 vel chu Phunchawng pan lehin boruak hi a sosang ṭha leh ta a ni.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.