Article

Consumer i harh ang u – XVI: Aadhaar leh Document dang inthlunzawm

– Laldinpuia
Secretary, Serchhip District Consumer Association

Aadhaar Card hian India ramah nghawng a nei lian chho zel dawn niin a lang. Hman tan anih atangin dodalna nasa tak a awm nghal a, sakhaw thil avanga nei duhlo te, sakawlh a lo puh tawk te an awm a. Tin mimal zalenna inrahbehna leh mimal chanchin kimchang inpholan sakna ni a ngai a nei duhlo pawh tam tak an awm bawk a. Mi thenkhat chuan India rama Court rorelna sang Supreme Court thlengin Aadhaar neih duhlovin India sawrkar an khing a, Supreme Court pawhin vawi tam tak Aadhaar chungchang ringawt hi a ngaihtuah tawh bawk a. Hetih lai hian India sawrkar chuan a ram chhung mipui teah Aadhaar card pawimawhzia tilang chho zelin sawrkar atanga hamthatna hrang hrang awm thei ang chi te pawh Aadhaar nei tan chauh a ruahman tawh a. Tin, India khua leh tui te chu an Aadhaar number chu an Document pawimawh dang nena inthlunzawm (link) turin ruahmanna a siam kal mek zel bawk a. Aadhaar leh document dang inthlunzawm tura sawrkarin thupek a chhuah thenkhatte chu lo tarlang ila-

1) Aadhaar leh Bank Account thlunzawm:
India rama Bank a Account nei zawng zawng te chuan an Bank Account chu an Aadhaar Card nen an thlunzawm vek tur a ni a, hun tiam chhunga an Bank Account leh Aadhaar card an thlunzawm loh anih chuan an bank Account chu hmanzui theih a ni lovang a, khawih chet theihloh a hren a ni bawk ang. Hemi huntiam chhung atan hian sawrkar laipui chuan December 31, 2017 thleng hun a pe a, hemi chhung hian Bank Account nei zawng zawng ten an Account hawnna Bank/ranch ah kalin an Aadhaar Card number kha a thawktute hrilhin va thlunzawmtir(link) mai tur a ni.

2) Aadhaar leh PAN Card thlunzawm:
Income Tax department hnuaia Permanent Account Number(PAN) Card nei zawng zawng te chuan an PAN Card chu an Aadhaar Card nen an thlunzawm vek tur a ni a. Hei hi Central sawrkar chuan huntiam chhung atan August 31, 2017 thleng tih a ni a. Amaherawhchu mipui lam an inpeih hmanloh avangin hun tiam hi pawtsei lehin December 31, 2017 thlengin pawhsei leh a ni (Ref no F.No.225/270/2017/ITA.II New Delhi, Dated 31st August 2017). Hun tiam chhung hian PAN Card leh Aadhaar card hi thlunzawm ngei ngei tur a ni. PAN Card leh Aadhaar card thlunzawm hi awlsam taka tih mai theih a ni a, income tax dept website atangin tih theih a ni a. Tin android apps ah a link na tur hi download mai theihin a awm bawk. A hnuaia link ah hian a thlunzawm theih bawk –
https://www.incometaxindiaefiling.gov.in/e-Filing/Services/LinkAadhaarHome.html

3) Aadhaar leh Mobile thlunzawm:
India rama telecom lama thuneitu sang Department of Telecommunication (DOT) chuan thuchhuah siamin India rama mobile service provider zawng zawng te chu kum khat chhunga an subscriber te mobile number leh Aadhaar number thlunzawm vek turin thuchhuah an siam a(File No. 800-26/2016-AS.II dated 23.03.2017). Huntiam chhung hi Feb 6, 2018 thleng a ni a, tichuan he thupek zawm hian India rama mobile srvice provider hrang hrang te chuan an subscriber te Aadhaar leh Mobile number thlunzawm tur hian hma an la chho ta mek a ni. Mobile Number leh Aadhaar thlunzawm tur hian Mobile neitu kungzungpui thla lak a ngai a, chuvang chuan a mobile number neitu tello chuan thlunzawm theih a ni lo.

Heng document kan tarlan tak ho leh Aadhaar Card inhthlunzawm hna hi a kaihhnawih Department lam ten chak takin hma an la chho mek zel a, tin kan hriat tur chu heng Document leh Aadhaar card thlunzawm nan hian mipui te tan sum sen ngai engmah a awm lova, a thlawn veka tih theih a ni.

Editor
C.Lalrochhuanga, New Serchhip, Serchhip - 796181 Mizoram Contact: 8974286711
http://www.zothlifim.com

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.