Article

Secondhand Smoke – Tobacco Cessation Clinic, Serchhip

Meizuk that lohzia chu kan hre theuh tawh anga, midang meizuk khu in kan taksaah harsatna a thlen nasat theihzia pawh kan hriat tel a pawimawh khawp mai. Tun tumah hian Secondhand smoke in mihring taksa a harsatna a thlen theih te kan tarlang dawn a ni.

Miin mei a zukin a meizuk khu hi a chuapah a hip lut fai vek ngai lo a, meizial khu chu boruakah leng velin a bul hnai a awm ten an lo hip lut ta thin a. A zu ve lote’n chu meizial khu an lo hip luh atang chuan a zutu in natna a vei theih chi hrang hrang te an lo vei ve thei phah thin a ni. Hmeichhia, Pasal meizial zu mi nei chuan an inneih atangin cancer veina chance a nei sang nghal sawt thin a,a chhan chu a pasal mei zuk khu a hip lut ve vang a ni. Puipunna hmun a meizuk hi khap tlat a ni a, amaherawhchu tun thlengin mi tam takin secondhand smoke avangin harsatna an la tawk fo mai, a bik takin meizu ngai miah lo naupang tam takin an chenpui(nu leh pa,unau te) meizial zuk khu an lo hip ve thin avangin natna chi hrang hrang an tawh phah nasa em em a ni.

Enge Secondhand Smoke chu?

Meizial fawh kai anih atanga vaihlo khu lo chhuak hi Secondhand Smoke an ti a, Environmental Tobacco Smoke (ETS) emaw Passive Smoke an ti bawk thin. Secondhand Smoke hi chi hniha then a ni leh a:

Sidestream smoke: Sikret, zozial, tuibur, vaibel, biri, cigar leh pipe tan kaina lam hmawr atanga vaihlo khu lo chhuak hi Sidestream smoke an ti a. He vaihlo khu hi a hlang tha (concentrated)-in a hlauhawm em em a ni.

Mainstream smoke: Mei zu tu in a hip luh bang mei khu, a rawn thawk chhuah leh hi Mainstream smoke an ti a, a dal hretin a hlauhawm nep deuh.

Mei zu ngai hauh lo ten mi mei zuk khu (secondhand smoke) an lo hip ve hian anmahni duh reng vanga hip lut an nih loh avangin Involuntary smoking emaw Passive smoking tiin an vuah bawk. Mei zu ngai lo miin mi mei zuk khu a lo hip luh hian a zutu ang thovin nicotine leh tur hlauhawm dangte kha a taksaah a lalut ve tho a ni.

Naupang tan a hlauhawm!
Naupang te hi taksa thanglai leh puitling aia boruak hip rang zawk an nih avangin Secondhand Smoke hian an taksa ah harsatna an thlen hma bik em em a. Naupang taksa a harsatna a thlen theih langsar deuh te chu:

  • Bronchitis, pneumonia vei theihna chance 72% in a sang
  • Naupang chuap a chak lo in & asthma an vei duh.
  • Puitlin hnuah Cancer awm tir tu.
  • Beng kherh
  • Rimhriatna a ti chhia
  • Lung that lohna
  • Naupang “Behavior” / awm dan dik lo
  • Naupang ngaihtuahna leh thiamtheihna a ti chhia.
  • Sudden Infant Death Syndrome (SIDS)

Nu naupai laia meizuk hi naupiang tur tan a hlauhawm em em a, naupiang zang lutuk, SIDS, naute rilru chak lo leh ADHD natna te a thlen thei a. Nu naupaiin mei a zuk nasat poh leh a naupai lai tan a hlauhawmna a zual sawt tih na a ni.
Engtin nge Secondhand Smoke lakah kan inven theih ang.

Thil harsa tak a ni hran lo ve, mi meizuk khu lakah inthliarfihlim hram hram hi a pawimawh em em a.Tin, kan chhehvel a meizu mi te bansan tura puih hi a tha hle bawk. Meizu mi reng rengin midang tibuai lo thei ang bera an zuk a ngai a, kan chenna in hi meizuk ngai lohna hmun a kan siam hi a pawimawh ber mai awm e. A bikin naupang chenpuitu te tan ngat phei chuan a pawimawh lehzual a ni.Meizu ngai lo naupang te leh puitling te Second hand smoke avanga natna chi hrang hrang kan vei theih te laka kan fihlim thei nan meizu mi ten puipunna hmun hrang hrangah te leh mahni in chhung ngeiah pawh mei zu lo ila,kan zu lo thei lo a nih pawh in kan nupui/pasal fanau te leh mipui ten kan mei zuk khu an hip ve lohna turin inthiarfihlim nachang hre thin ila.Chu chuan secondhand smoke avanga harsatna kan tawh thin te a lo reh phah dawn a ni.

Editor
C.Lalrochhuanga, New Serchhip, Serchhip - 796181 Mizoram Contact: 8974286711
http://www.zothlifim.com

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.