Chanchinthar Mizoram

14th Finance Commission hnenah cheng vbc. 50,000 hû vel dil tum

Finance Commission 14-na-in Mizoram an rawn tlawh hunah hmasawnna hna thawhna tur leh mamawh dang chi hrang hrang cheng vaibelchhe 50,000 bawr vel hu lo dil tum a ni.

Finance Secretary Pu F.Vanlalruata sawi danin Zirtawpnia Chief Minister hova hemi chungchang an sawihona aṭangin department ṭhenkhatin rawtna thar siam belh tur an neih te chu Thawhlehni thlenga thehluhna hun hawn sak an ni a. Hemi hnu-ah hian Mizoramin Finance Commission hnena a dil tur zat chiah chu a hriat theih dawn chauh niin a sawi.

Mizoram sawrkarin Finance Commission hnena thehluh tura a ruahman zingah hian thil thar engemawzat a awm a. Chu’ng zingah chuan eirukna do pawl Lokayukta dinna leh enkawl zuina senso atan cheng vaibelchhe 122.21 ruahmanna a tel a. Chubakah chuan Autonomous District council pathum te inenkawlna tur cheng vaibelchhe 1,850.66 bakah tualchhung sawrkar – Municipal Council leh Village Council te tana senso tur ruahmannate a tel bawk a ni.

Mizoram Chief Minister Pu Lal Thanhawla ho hian Secretariat Conference Hall-ah, Council of Ministers, Parliamentary Secretaries, Chief Secretary, Secretaries te leh Department hotu ber ṭheuh-te hemi chungchangah hian an ṭhukhawm a. He an inhmuhkhawmnaah hian February 26 leh 27 a Mizorama lo kal tur Finance Commission 14-na a Member-te, hnenah Mizoram mamawh tur chi hrang hrang sawrkarin a thehluh tur thlirlawkna leh siamthat ngai lai siamrem hna an thawk a ni. Finance Commission hnena thehluh tur hian Mizoram sawrkar chuan rawtna lian tham tak tak thehluh tur cheng vaibelchhe 38,417.26 laia lian a siam bakah State sawrkar mamawh bik pawimawh zual atan Department 28 leh AutonomousDistrict Council 3 te’n State Specific Needs tih hnuai ah cheng vaibelchhe 6,000 chuang hmanna tur ruahmanna thehluh an tum bawk.

Finance Commission hnen-a thil pawimawh thehluh tur zingah hian Mizoram a kawngpui dung km 5160 zinga km 2940 alkatra luan sa leh km 2,220 black topping la tih loh te leh sawrkar insak sa te leh hmunhma metre 6,19,500 bial a zau te kum 5 chhunga enkawl na’n cheng vaibelchhe 500 ruahmanna, Chhiatrupna thleng thei laka invenna leh a lo thlen thulha buaipuina senso State disaster response and management din tak enkawlna tur sum ruahmanna te bakah hnaruak hnawhkhah ngai, hna thar lak tur, contract a sawrkarin a chhawrte leh muster roll a sawrkarin a chhawr mek te tinghehna tura ruahmanna siamte chu a pawimawh zual deuh te an ni.

Editor
C.Lalrochhuanga, New Serchhip, Serchhip - 796181 Mizoram Contact: 8974286711
http://www.zothlifim.com

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.