Chanchinthar Mizoram

Aizawl aia changkanga Serchhip-a tih Minister-in lawmawm a ti

Nimin chawhma dar 10 khan Art & Culture Auditorium Berawtlangah Public Health Engineering Department (PHED) chuan Review Meeting, 2016 an nei a, PHED changtu Minister Pu Zodintluanga chuan khuallian niin meeting hi a hmanpui a, SMS hmanga tuisem hun tur inhriattirna avangin mipui an lâwm tih sawiin, Minister chuan, “Aizawlah za-ah za la famkim lo mahse SMS blast vangin mipui an hlim phah a, tunah Aizawl aia changkang hretin Serchhip Division-in SMS-in tui sem hun darkar thlengin an hrilh theia a lawmawm,” a ti a, chutih rualin Division dang te SMS hmanga tuisem hun tur hriattirna mipui hnena pe tura tih tun thlenga la ti lo te an harsatna a hnena hriattir turin Minister chuan a ti.
PHED Minister chuan kalphung thlak a ngaih thu sawiin, “Review Meeting kan nei fo a, inhnial lovin kan tluan ṭhin a, inhnial hi kan hreh lutuk a, hei hi kan thlak a ngai tawh a ni,” a ti. Engineer te chu hmun hrang hranga thawk an nih avangin an harsatna inhriat-tawn a pawimawh thu sawiin inhnialna hian hmasawnna a thlen avangin inhnial tam turin a chah a, “Kan kal dan ngai alawm ti mai lova hmasawnna zawnga kan inthlak ngam a ngai a, kan in ‘change’ ngam hi a pawimawh,” a ti bawk.

Engineer te chu mipui tana hnathawka hlawh la an nih avangin an inenlet fo a ṭul thu Minister chuan a sawi a, “Mipuite hian hnunglamah min nuih em, ‘an in leh lo a va lian ve’ te min ti em tih hi kan inenlet a ngai,” a ti.

Democracy ramah chuan mipuiin roreltu an thlan thu Khuallian chuan sawiin, roreltute chuan mipui te hnen-ah chhiah la-in chu chhiah hmang chuan hmasawnna tur programme siamin a tipuitling turin hnathawktu an ruai ṭhin, a ti a. “Mipui hmasawnna turin keini Department ah sawrkarin min ruai a. Mipui hnena tui in tur thianghlim leh thiang-hlimna pe turin rawih kan ni a, keimahni ni lovin kan ngaihpawimawh hmasak tur chu mipui a ni,” a ti bawk.

Hna inhriatpui tawnna avangin thawhhona a ṭhat thu sawiin, “Kan inhriatpuia hna kan thawhho chuan kan ṭangho thei a ni. Langtlang taka hna kan thawhho zel chuan harsatna kan nei lovang,” tiin Minister chuan Engineer te a fuih bawk.

Meeting-ah hian Er. Anup Chhetry, SE (M) chuan ‘Review of Physical and Financial Achievement of Works under NRDWP’ a sawi hawng a, Er. HC Lalnunzira, SE (U)-in ‘Review of Physical and Financial Achievement of Works under NLCPR, 10% Lumpsum Projects, NEC etc.’ a sawi hawng bawk.

Meeting hi PHED Secretary Er. Lianchungnunga’n a kaihruai a, Parliamentary Secretary Pu Hmingdailova Khiangte chu Khualzahawm niin, ani pawh hian thu a sawi a, Review Meeting hi vawiinah Tourist Lodge Chaltlangah neih chhunzawm a ni ang.

Editor
C.Lalrochhuanga, New Serchhip, Serchhip - 796181 Mizoram Contact: 8974286711
http://www.zothlifim.com

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.