Chanchinthar India Mizoram

Assam Rifles hnena thuneihna pek ennawn dawn

Sawrkar laipuia Home Ministry chuan tun hnaia India hmarchhak state panga-a Assam Rifles sipai te hnena warrant te lova mi dap theihna leh mi man theihna thupek a chhuah chu a zavaiin ennawna siamthat leh a ni ang a ti.

Nimin khan Home Ministry chuan February ni 19-a Assam Rifles te hnena CrPC (Criminal procedure code) hnuaia thuneihna pekna hriattirna tihchhuah chu la tihfel rih loh a ni a, state sawr-kar bik te nen hian inrawnin he thil hi a pumpuia ennawn leh turin thutlukna an siam leh niin ANI chuan a tarlang.

February ni 19 khan Centrah sawrkar chuan Assam, Arunachal Pradesh, Manipur, Nagaland leh Mizoramah te Assam Rifles te chu warrant tel lova tupawh man theihna leh hmun engpawh dap thei tura thuneihna a pe a, Home Ministry-in hemi chungchanga thupek a tihchhuahah chuan Assam Rifles officer rank hniam ber chin chu CrPC hnuaiah he thupek hi a pe a, heng state panga-a ramri hrul district-ah te Assam Rifles te CrPC Sub section (1) of Section 41, 47, 48, 49, 51, 53, 54, 149, 150, 151 leh 152 te hnuaiah he thuneihna hman theihna tur thuneihna hi a pe a ni.

Hemi chungchangah hian PRISM Party chuan thuchhuah siamin, Central sawrkarin Assam Rifles te hnena warrant tel loa mi man leh dap theihna thuneihna a pek chu sut leh nghal tura an duh thu leh a tul anga an bawhzui tur thu an tarlang a, he thuneihna pek hi chi inthliarna leh Tribal te rah-behna, India danpui kalh leh Human Rights bawhchhiat-naah PRISM Party chuan an ngai tih sawiin, India ram hmun dang zawng zawngah hetiang hi kalpui a nih si loh chuan tihtawp nghal a ni tur a ni am ti a, hemi chungchang hi National Human Rights Commission leh Human Rights Forum hrang hrangah thlen turin an inbuatsaih tan nghal tih an sawi bawk.

Editor
C.Lalrochhuanga, New Serchhip, Serchhip - 796181 Mizoram Contact: 8974286711
http://www.zothlifim.com

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.