Chanchinthar Mizoram Zirna

Chawngteah MZP leh CADC hotute an inkâwm

Mizo Zirlai Pawl (MZP) hruaitu te leh Chakma Autonomous District Council (CADC) thuneitute chu Chakma Council CEM office Chawngte C-ah nimin khan an inkawm.

MZP hruaitu te hi President L. Ramdinliana Renthleiin a ho a, CADC thuneitute hi CEM Rosik Mohan Chakma in a ho bawk a ni.

Inkawm khawmnaah hian MZP hruaitu te chuan an thil ngaihmawh te sawipuiin, CADC huamchhunga Mizo khua te council aṭanga development awm thei ang te lo pe a, lo ngaihsak ve tur te, CADC huam chhunga Chakma khua dân lo a din te ṭhiahho dan tur te, Mizoram chhunga Bangladesh aṭanga foreigner lo lût ru tam lutuk chungchang te, CADC huam chhunga Mizo missionary ten harsatna leh enhran an tawh chungchang te, CADC hnathawk tur lak chungchanga Zohnahthlak te duhsak ve tur leh an tling a nih chuan lo la ve tur te leh CADC-a Chakma inhung bikna dân chungchang te an thlen a ni.

CEM Rosik Mohan Chakma chuan CADC huam chhungah Chakma te tana inhungbikna dan, Chakma ni lovin, in leh lo, ram an neih theih lohna dân siam a awm lo a ti a. Chakma nilo pawhin an duh a, pawisa an neih chuan in leh lo, ram an nei vek thei a ni a ti a. Mizo khua CADC area-a awm te tan induhsak loh bikna an nei lova, Chakma khua te nen angkhat vekin an en tih sawiin, dân loa khawdin erawh tlemte an nei a, ṭhiah dan tur chu an ngaihtuahho theih thu MZP hruaitute chu a hrilh a ni.

CEM chuan CADC hnuaia hnalak a awm chuan a theihna chin chinah Zohnahthlak te duhsak an ni ang a ti a, Bangladesh aṭanga lo lût foreigner te an awm tih an hria a, an tam leh tam loh chu an chiang bik lo tih a sawi a, Mizoram Sorkar te nen tangkawp in foreigner te dapchhuah kawngah hma an la ho zel dawn a ni, a ti bawk a ni.

MZP hruaitute hian Chakma Autonomous District Council area-a Zohnahthlak khaw hrang hrang te fangkualin an dinhmun te an zirchiang nghal dawn bawk a ni.

Editor
C.Lalrochhuanga, New Serchhip, Serchhip - 796181 Mizoram Contact: 8974286711
http://www.zothlifim.com

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.