Chanchinthar Hriselna leh Damdawi Mizoram

CM-in ‘Project Himna – MADAT’ a tlangzarh

New Economic Development Policy (NEDP) hnuaia sawrkarin ruihtheihthil laka ṭhalaite an fihlim theihna tura ruahmanna thar “Project Himna – MADAT (Mizoram Against Drugs, Alcohol and Tobacco)” a duan chu nimin khan Mizoram Chief Minister Pu Lal Thanhawla chuan I&PR Auditorium-ah a tlangzarh.

Chief Minister chuan Mizoram chu kawng hrang hrang-ah inchhuanna tur nei mah ila a ṭhalo leh duhawmlo lamah India rama a ‘ber’ nihna kan hauh erawh chuan nasa zawka hrisel-na kawngah hma kan lak tulzia a tilang a ni, a ti a, vaihlo leh ruihtheihthil dopui beih tharna MADAT duan a ni chu lawm-awm a tih thu leh a hlawhtlin ngei a beisei thu a sawi a ni.

He hunah hian MADAT hmalakna puala Aizawl District chhunga school hrang hrangte Project hming phuah intih-siakna buatsaih a tiṭha zual pathum te hnenah lawmpuina thuziak leh pawisafai hlan a ni.

He Project hi Aizawl DC Office kaltlanga Pilot Project duan niin, Upper Primary School zirlai chin chunglam a huam a, Project HIMNA – MADAT hi Aizawl District chhunga school thlan bikteah kalpui tur niin, mipui chêng zât tam avang leh ruihtheihthil ti an tam avangin he project enchhin nan Aizawl District chu thlan a ni a, Health & Family Welfare, Education leh Social Welfare Department te bakah , Anti-Tobacco leh Anti-Drug Abuse lama tlawmngai pawlte nen ṭanghovin Aizawl DC kaihhruai-na hnuaia hmalak a ni a, A project hmalakna zingah hian naupang zingah ruihtheihthil avanga an chunga thil ṭhalo thleng thei hrang hrang inhrilhhriatna neih te, school-a Anti-Tobacco/Anti-Drug Abuse Club-te din te, Art competition buatsaih te, pamphlet, poster, sticker leh complaint board siam te, zirna in bulhnai a vaihhlo leh ruihtheihthil eng chi mah zawrh phallo tura hmalak te, Public Education campaign buatsaihte leh zirlai te hriatna tizau tura hospital tlawh programme siamte bakah zirlai nu leh pate zingah leh zirtirtute zinga vaihhlo nghei uar tura hmalak te a tel a ni.

Chawhnu lamah Aizawl District chhunga sawrkar leh private school 50 thlanchhuah a zirtirtu thawk mek te tan training programme buatsaih a ni bawk.

Editor
C.Lalrochhuanga, New Serchhip, Serchhip - 796181 Mizoram Contact: 8974286711
http://www.zothlifim.com

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.