Chanchinthar Mizoram

Dan leh hrai chungchanga Office-a thawk te tan Training buatsaih

Nimin khan Law & Judicial Minister Pu Lalsawta chuan Department hrang hranga Dan leh Hrai leh thubuai hla buai chungchanga (court case) mawhphurhna nei Nodal Officer, Superintendent leh Dealing Assistant te tan hemi chungchanga ni 2 awh zirtirna Law & Judicial Department in an buatsaih chu ATI Auditorium-ah a hawng.
Law & Judicial Minister Pu Lalsawta chuan Dan chu hma lak zelna tur leh hmasawnna atana siam anih thu sawiin Sorkar hian mipui rawng a bawlnaah tihtur a ngah hle a. He hnathawhnaa kan innghahna fo chu dan anga dik taka Sorkar hnathawkte’n kan thawh hi a ni, a ti a. Department office reng reng ah dan leh hrai chungchanga mawhphurhna neite an pawimawh zual bik thu sawiin kawng engkimah dan ang thlalpa hna an thawh leh thu an dah hi a tul a ti a. Office-a thu in nih angin Court-a chak tur chuan kan sawi tak ang khan dik taka Sorkar-in thil a tih a ngai a. Dik taka thil kan tih chhung chuan min khing thin mahse kan chak zel ang, a ti bawk.

Minister chuan Sorkar ukil, Court-a sorkar aiawha ding thin te hnenah lehkha pawimawh leh document famkim, chipchiar taka thu hrilhfiahna leh comment-te a hun taka pek a pawimawh thu sawiin Sorkar-in dik lohna a neih miah loh lai pawha Para-wise Comment buatsaih tlai lutuk emaw, famkim tawk lo emaw, dik chiah lo emaw avangin Sorkar hi mimal leh Pawl min khinnaah kan chak lo zawk thei fova, chuvangin vawiina training hi a pawimawh hle a ni, a ti.

Pu Lalsawta chuan Hman ni lawka zawh tak, Budget Session-a The Mizoram Public Services Act, 2015 passed anih thusawiin Department engemaw zata mipuirawngbawlna tam takah chuan hun bithliah chhunga an thil dil pek ngei ngei a ngai dawn a, Sorkar hnathawkten tan nasa lehzuala kan lak a, taima taka mipuite mamawh dil kan pek chhuah zung zung a ngai dawn a ni, a ti. Ram nuam leh ram ropui siam tur hian keini Mizote hian theihtawp kan chhuah phawt chuan kan hlawhtling ngei ngei ang tih ka hria a. Mizo chhuan lo la awm zel tur tana chenna tlakah vawiina mite hian kan siam thei a ni tiin training te chu theihtawp chhuah turin a ngen.

Training hawnna programme hi Law & Judicial Department Secretary Pu Singthanga chuan kaihruaiin Pu Zahmingthanga Ralte, Deputy Secretary, Law & Judicial Department chuan training kalhmang tur chungchang a sawi.

Training ah hian Law & Judicial Department-a officer engemaw zat ten paper an buatsaih chu an zirho dawn a, sawizauna te neiin zawhna leh chhanna hun te neih a ni dawn.

Editor
C.Lalrochhuanga, New Serchhip, Serchhip - 796181 Mizoram Contact: 8974286711
http://www.zothlifim.com