Chanchinthar Mizoram

Dr. BD Chakma MOS aṭanga bân tura CM ngenna Aug. ni 25 thleng ngaichâng dawn

Nimin tlai dar 3-a Central YMA Committee Room-a NGO Co-ordination Committee meeting chuan Dr. BD Chakma, Minister of State aṭanga bân tura Chief Minister hnena ngenna ni 27 July, 2017-a a thehluh tawh chu hmalakna engmah a awm rih loh avangin, August ni 25, 2017 thleng ngaihchan ni se a ti a, August ni 25, 2017 thlenga hmalakna sawrkar-in a nei lo a nih chuan hmalak zel dan tur ngaihtuahin, August ni 26, 2017 hian inkohkhawm leh ni se, a ṭul dan a zirin rampumah kawngzawh leh Total Band huaihawt nise a ti.

Nimina NGO Coordination Committee thuchhuah chuan Dr. B.D. Chakma, MOS bang tura a tihna chhan chu “Kum 2014-a Zofate chawlhbuk MZP-in Borapansury khua, CADC huamchhunga a sak dawn ṭum khan, Dr. BD Chakma hmalakna avangin MZP Hqrs. Lunglei hruaitute chhan leh vang awm miah lovin, Mizoram Police-in an lo man tawh a. Zofate chawlhbuk Borapan-sury-a MZP-in a sak, Chakma mipuiten an dodal chung-changah Chakma NGO hrang hrangten Borapansury MDC Bye-Election an Boycott-a, Borapansury MDC Bye-Election Boycott tura an inhmuh khawmnaah pawh khan Dr. BD Chakma, MOS, Mizoram hi rorelnaah pawh a puipa berte zing a mi a ni, an ti a, Minister of State-a lakluh (Swearing in) neih laia India Constitution hnuaia dik tak leh rinawm taka hnathawk tura intiam, sawrkar hmalakna tiṭhuanawp zawnga Election Boycott-tu zinga a tel ta mai kha Joint NGO chuan a ngaithiam lo hle a ni tiin, India Constitution hnuaia Election Boycott zawnga a khawsa leh ram leh hnam inkara inrem lohna thlen zawnga hma a lak avang khan Joint NGO meeting chuan Minister ni zui tlakah an ngai lo tih an sawi.

Hemi hmaa nimin veka tlawmngai pawl hrang hrang Central YMA, MUP, MHIP, MZP, MSU leh Political Party te Aizawla Central YMA Committee Room-a ṭhukhawm chuan nakum Assembly inthlanpui neih turah Chakma Candidate an neih leh neih loh tur chungchanga Party thutlukna chu thlaleh ni 15 aia tlai lovah hriat an beisei a, Citizen Amendment Bill, 2016 chungchang pawh sawiho niin, hemi chungchangah hian Joint Meeting on the Citizenship (Amendment) Bill, 2016 Chairman hnenah, he Bill duhlohna leh ṭha tih lohna All NGO leh All Political Party hmingin thlen ni se an ti a, he Citizen Amendment Bill, 2016 Committee hotute pawh Mizoram rawn tlawh ve tura ngen a, a ṭul anga Delhi-ah pawh aiawh intirh ni se an ti bawk.

Editor
C.Lalrochhuanga, New Serchhip, Serchhip - 796181 Mizoram Contact: 8974286711
http://www.zothlifim.com

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.