Chanchinthar Mizoram

E/Roll Special Summary Revision atan ruahmanna kalpui mek

Mizoram Assembly inthlanpui hmachhawn tur thlira Mizoram Electoral Roll Special Summary Revision neih tur atan inruahmanna te chak taka bawhzui a ni.

Election Jt.CEO Pu H.Lalengmawia’n nimin khan an hmalakna chungchang hi thuthar thehdarhtute Aizawl-ah hrilhin Election Commmision of India a tih angin, Special Summary Revision hi July Ni 1 aṭanga ṭan tur a ni dawn a, Final Roll chu August Ni 16-ah tarchhuah hman tura tih a nih thu a sawi.

Pu Lalengmawia chuan inthlan hmachhawn turah sawiselna leh puhmawhna hrang hrang awm ṭhin mahse vote thlakna khawl EVM chu Election Commission of India duhdan anga hman tum a nih thu a sawi a. Mizoramin EVM 1500 a neih zingah 187 chu siamthat ngai a nih avangin ECIL Hqrs. Hyderabad-ah thawn tura buaipui mek a ni tih sawiin, ECI phalna in Tripura atangin EVM 200 hawh tum a ni a ti a. Mipui thlan sawrkarna siamah hian vote nei an vote hlu tak an thlak ngei chu khua leh tui ṭha nihna a nih avangin mipui zirtir kawngah tualchhung thuthar lakhawmtu te ṭawiawmna a pawimawh thu a sawi bawk.

Pu Lalengmawia chuan, Inthlan leh a kaihhnawih thil a mipuiten an lungawilohna leh hriatfiah duh an neihte awlsam taka an zawhfiah zung zung theih nan Public Grievances Redressal Mechanism chu Election Commission-in a duang chhuak tawh tih sawiin mi tupawhin an lungawilohna leh hruitfiah duh an neih te phone hmanga an zawh zung zung theihna turin district tinah toll free telephone connection neih vek a ni a. Directorate-ah englai pawhin telephone no.1950 ah election kaihhnawih thil a hriat duh nei tan bik biak theih reng a ni a ti.

Tun dinhmunah Mizoram-ah Vote nei mi 6,83,801 an awm a, mihring za zela 60.11 Roll-ah an awm a ni. Hetihlai hian, ni hnih awh tur ERO leh AERO-te training Aizawl-ah nimin khan ṭan a ni.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.