Chanchinthar Serchhip

Faina lama intihsiakna tur atana inbuatsaih dan tur sawiho

Urban Development & Poverty Alleviation (UD&PA) Department-in Mizorama khawpui te faina kawnga intihsiakna a buatsaih tur atana Serchhip khawpui lo inpuahchah dan tur sawiho-in nimin khan Serchhip DC Conference hall-ah District Bawrh-sap Pi Sangchhin Chinzah kaihhruaiin Serchhip khawpui chhunga Officer te, Village Council tin aiawh te, tlawmngai pawl leh khawtlang hruaitu te leh chanchinbumiten Serchhip khawpui fai zawka enkawl dan leh hmalak dan tur hrang hrang sawihona an nei.

Meeting kaihruaitu Pi Sangchhin Chinzah chuan UD&PA Department-in District khawpui te leh khawpui dang te tan faina kawnga intihsiakna a buatsaih thu sawi-in, chu intihsiaknaa dinhmun ṭha taka Serchhip khawpui a din theih nana ruahmanna leh rawtna te sawi chhuak turin kalkhawmte a sawm a, Serchhip District chu ram laili Mizo hlang awmkhawmna a nih avangin District dangte tan pawh entawntlaka awm tur a nih thu sawiin, tuna faina kawnga hmalak tum pawh chu intihsiakna atan chauh ni lovin, faina chu mahni tana thilṭha a nih avanga ngaih pawimawh a ṭul thu sawiin, mahni tana thil ṭha ti chunga lawmman dawn phei chu a ṭha hle a ni a ti a, kalkhawm te chu mipuiah Awareness ṭha taka nei turin a chah a ni.

Nimina kal khawmte hian UD&PA-in khawpui fai a tehna tur chi hrang hrangte sawi zuina leh hmalak dan tur rawtnate an siam a, nimina hmalakna tur an chhawp chhuah zingah hian faina kawngah VC Area tina Sanitation Committee-ten an area ṭheuhah hma la-in an fai leh fai lo vil zui pawh kutken nghal se an ti a, VC leh YMA ṭangkawpin an huamchhunga an mamawh dan a zirin hnatlang vawi khat emaw, a aia tam emaw ko se an ti bawk.

Sawrkar Office tinten faina kawngah hma an lak beisei a ni a, VC tin te chu an area chhunga biak in tina chhiar chhuah turin faina kawnga ṭan lak a ṭul thu lehkha sem chhuak tura tih an ni a, vantlang hmuna bawlhhlawh bawm dah belh chu a veng neitu VC te kutah dah a ni a, ran khuahkhirh chungchangah VC-ten an hmalakna chhunzawm zel se an tih bakah ran khuahkhirh chungchang leh thil dang engemawzat chu sawrkar thuneitute lo ngaihtuah zui tur leh bawhzui tura dah a ni bawk.

Urban Development & Poverty Alleviation Department hian District Capital faina lama intihsiakna atan hian tehna pawimawh chi 6 (ruk) a siam a, chungte chu: Open Defecation Free (ODF) Mark 30, Bawlhhlawh sawngbawl dan (Solid Waste management) Mark 20, Information, Education & Communication (IEC) Mark 10, Mipui tha thawh (Community Participation) Mark 15, Tui chhe luankawr (side drain) Mark 15 leh Mipuite lungawina (Public Feedback) Mark 10 pute an ni a, heng point hrang hrangte khian chipchiar lehzuala intihsiakna kalphung dang an la nei leh hlawm bawk. He intihsiakna endik hna hi September ni 1 atanga ni 20 inkarah hian Evaluation Team ten an nei kual dawn a ni.

District Capital fai intihsiaknaah hian pakhatna in Rs.1,00,000 an dawng ang a, pahnihna in Rs.50,000 leh pathumna in Rs.30,000 leh Citation te an keng tel ang.
——————————————————-

Editor
C.Lalrochhuanga, New Serchhip, Serchhip - 796181 Mizoram Contact: 8974286711
http://www.zothlifim.com

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.