Chanchinthar Hriselna leh Damdawi Mizoram

Health Minister-in man tlâwm zawka damdawi lei theiha dawr, Generic Drug Store a hawng

Health Minister Pu Lal Thanzara chuan Inrinni khan Aizawl Dinthar Veng, Health Directorate Office bulah man tlawm zawka damdawi lei theih-na dawr Jan Aushadhi Store (Generic Drug Store) a hawng.

Pu Lal Thanzara chuan mipui mimir ban phâk tura man tlawm zawka damdawi zawrhna Aizawl Dinthar Vengah hawn a ni leh ta chu lawmawm a ti a, Mizoram chhung District Hospital tinah Generic Drug Store hawn a nih theih nan hmalak mek a ni, a ti.

Health Minister chuan mipui hrisel nan sawrkarin theihtawp a chhuah a, India ram State lian leh hausa zawkah pawh doctor pakhatin mihring chutizat enkawl tur tih norms an zawm thei lo a, Mizoram State rethei zawkah a harsa lehzual tih sawiin mipui mamawh zualpui phuhru turin doctor 26 lak belh an ni, a ti a. Heng doctor lak tharte awmna tur transfer and posting niminah tihchhuah a ni, a ti a. Hriselna kawngah Mizo mipui thanharh a tul tiin taksa insawizawi uar a, ei leh in, zuk leh hmuama insum turin Mizo mipuite Pu Lal Thanzara chuan a chah a ni.

Jan Aushadhi Store (JAS) ah hian damdawi dawr pang-ngai aiin damdawi a let thum let li vela man tlawm zawkin a lei theih a. Damdawi hi a man to dan a zirin category 3 (A, B, C) ah ṭhen a ni a. A man to chi chu – A, a laihawl – B, a man tlawm chi – C tia bithliah a ni.

Jan Aushadhi dawrah hian Group B thleng phak damdawi a awm mang lo a, damdawi dang man tona chhan ber chu a tuamna (packaging) leh a cheimawina te a ni a, a man tlawm avanga quality chhe chuang lo Generic/Jan Aushadhi damdawite hi a man a tlawm theih nan a tuamna man tlawm zawk, him tawk si, a chei mawina tello hman a ni a. Jan Aushadhi/Generic damdawite hi National Accreditation Board for Testing and Calibration Laboratories (NABL) pawm-pui laboratory ah a that leh ṭhat loh uluk taka enfiah vek a ni.

Editor
C.Lalrochhuanga, New Serchhip, Serchhip - 796181 Mizoram Contact: 8974286711
http://www.zothlifim.com

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.