Chanchinthar Politics

Judicial Inquiry-a chhui phût; Plan sum a pung lo:MP(RS)

Rajya Sabha member Pu Lalhmingliana chuan tun hnaia Laipuitlanga mi 17 zetin nunna an channa chhiatna raptlak tak chu khuarel chhiatna ni lovin sawrkarin a siam chawp chhiatna a ni a ti a, Judicial Inquiry chhui tir a phut.

Inrinnia Aizawla chanchinthar thehdarhtute a kawmnaah Pu Lalhmingliana chuan he chhiatna thleng hi sawrkarin a office building tlu mai thei a ṭhiah mai loh avanga lo thleng a ni a ti a. An party MNF chuan he thil chhui tur hian Magisterial Inquiry ni lovin Judicial Inquiry, a mawhphurtu chiang taka tarlang tur leh a tuartute tan râlna leh zangnadawmna pawh awmze nei tura rawt tur din an duh thu a sawi nawn a ni. Hetianga chhiatna rapthlak tak a thlen laia ram hotupa pa ber Chief Minister-in chhuanlam ho te te hmanga Aizawl chhuahsana a biala a kal chu mipui ngaih pawimawh lohnaa an ngaih thu a sawi bawk.

Rajya Sabha MP chuan kumin Mizoram Plan hi Cheng vaibelchhe 2,500 a ni a. Nikumah cheng vaibelchhe 2,300 a ni a. Sorkar chuan a punna hi za zela 19.05 niin an sawi a. Sawrkarin a tih chhan nia a sawi chu kum hlui-a Plan size cheng 2,300 ruahman aṭanga Special Central Assistance hnuaia Special Road Project atana cheng vaibelchhe 200 dah kha hmuh a nih tak loh avangin nikum Plan kha cheng vaibelchhe 2,100-ah an ngai ta a, Sawrkar ngaihdan pawm lo va, cheng vaibelchhe 2,300 aṭanga cheng vaibelchhe 2,500-a pung chho anga ngaih chuan a punna chu za zela 8.7 a ni, a ti.

A sawi zelnaah kum dang zawnga North Eastern Council (NEC) leh DoNER aṭanga hmuh ṭhin Non-Lapsable Central Pool of Resources (NLCPR) te hi Plan pawna min pek ṭhin a ni a. Kumin (2013-14)-ah erawh chuan Plan chhungah min dah sak ta a. Chumi a nih phei chuan kuminah hian NEC hnuaiah cheng vaibelchhe 122.64 dah a ni a, NLCPR hnuaiah cheng vaibelchhe 98.77 dah a ni bawk si a, a vai chuan Plan pawna kan hmuh ṭhin cheng vaibelchhe 221.41 chu Plan-ah an telh ta bawk si a. Chumi kan paih chuan kumin Plan size hi cheng vaibelchhe 2,278.59 chauh a ni ta a, nikum Plan size nena chhut chuan a punglo mai ni lovin nikum aiin a tlem zawk tihna a ni a, a tlem zawkna chu cheng vaibelchhe 21.41 a ni a ti bawk.

Inrinnia Chanchinbumite an kawmna ah MNF hruaitu dang Wing Commander J. Lalhmingliana chuan Nikum August thla atanga Helicopter Service Mizoramin a hman tak chungchangah Helicopter Service-na tan hian Ministry Of Home Affairs in za zela 75 a tum tih a sawi a, Mizoramin a tum ve tur za zela 25, kum khata cheng Nuai 20 a tum ve tur chu kum khat dawn a tlin hnu pawhin a la pe thei lo tih a sawi a. Lengpui Airport chu Airport Authority of India (AAI) kuta hlan a nih chuan an ngaihsak lo hle dawn nia an hriat thu a sawi a. An party chuan AAI kuta hlan lova Mizoram sawrkar kuta a la awm reng an duh thu a sawi bawk a. Thlawhna lo tum dawna pilot lo ṭanpuitu Instrumental Landing System ngaihthaha enkawl ṭhalovah sawrkar an puh bawk a ni.

Editor
C.Lalrochhuanga, New Serchhip, Serchhip - 796181 Mizoram Contact: 8974286711
http://www.zothlifim.com

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.