Chanchinthar Mizoram

Langkaih Lei la dang ping chhunzawm zel

Mizoram leh Tripura inri-na Kanhmun leh Dam-cherra vela inepna boruak chu a ngaiin a la awm reng a, Langkaih Group YMA leh Taitesena Group YMA ten Langkaih lei an danpin pawh chhunzawm zel a ni.

Inepna boruak tidai tura tun thla ni 17-a Kanhmun PWD IB a BDO level inbiakna neihah Tripura lama Tuikuk aiawhte chuan Langkaih leh Taitesena Group YMA te thil phut chungchangah anmahni thuin thutlukna an siam theilo tih an sawia, Young Bru Association hruaitute an berawn hmasa phawt dawn niin an sawia, chumi hnuah an thu kalpui dan leh inbiakna chhunzawm dan tur chu Langkaih Group YMA hruaittute an hriattir leh dawn a ni. He inbiaknaah hian Langkaih leh Taitesena Group YMA te chuan thil phut chi 4 an sawi chhuak a, chungte chu Tuikuk misual ralthuam keng te Mizoram chhunga mawi lo taka an chet vangin an aiawhin Tuikuk mipuiten ngaihdam dil rawh se tih te, kumin April ni 23-a Tuikuk mi Damcherra-a kawng zawhten Sebaram Reang thih chungchangah Mizoram Police leh IR Battalion mite a mawhphurtua an puh chungchangah ngaihdam dil rawh se tih te, Tuikuk-ten Damcherra-ah lungawilohna emaw, bandh emaw, kawng block emaw siam tawh suh se tihte leh ralthuam keng Tuikuk misualten an suam Bungṭhuam leileta hnathawktu Monav-te chhungkaw hnenah Muslim Association phut angin zangnadawmna cheng nuai 10 Tripura sawrkarin pe rawh se tihte a ni.

He inbiaknaah hi Zawlnuam BDO Pu Lalnundika’n a kaihruaia, Tripura lam a hnam hrang hrang leh sumdawng pawl aiawhte chu Damcherra BDO Pu V Darlawng in a kaihruai a ni.

He inepna boruak avanga Langkaih lei a tawn tawna dan pin a nih avang hian Central sawrkar duh dan anga Mizoram Tuikuk, Tripura Camp a awmte laklet tumna pawh a kal tluang thei lova, hemi hma lam a Naisingpara leh Assapara Refugee Camp-a Mizoram Tuikuk awmte lalet leh tura endikna neih tum chu thulh rih a ni a, boruak siam ṭhat leh hun atan dah a ni.

Editor
C.Lalrochhuanga, New Serchhip, Serchhip - 796181 Mizoram Contact: 8974286711
http://www.zothlifim.com

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.