Chanchinthar Serchhip

MJA Serchhip District-in Agriculture hmalakna an tlawh

Zirtawpni (13.10.2017) khan Mizoram Journalists’ Association (MJA) Serchhip District member te chuan Serchhip Zawlpui phaia Agriculture Department hmalakna te a hmunah an en.

Serchhip MJA Member te hi Pu K.Laltlanmawia, AEO chuan lo dawngsawngin an hmalakna hrang hrangte a hmuna enpuiin a hrilhfiah a, Pu K.Laltlanmawia chuan Agriculture Department-in an tum ber chu leilet siamna ram te ṭangkai zawka hmanga kum khata vawi hnih tal thlai tharna atana hman tura buatsaih a nih thu a sawi a, tunah hian Zawlpui leilet-a mimalin buh an chin rualin Agriculture Department pawhin buh chi hrang hrang enchhinin, mimal leilet engemaw zat hawhin buh chi hrang hrang chingin an enchhin mek a, an enchhin zingah hian ni 140-a thar thei te, hectare 1-a phur 300 aṭanga phur 500 thleng thar thei te an enchhin mek a, heng an buh enchhin te hi seng theih a ni ṭep tawh hlawm a, kumin hian ruahtui tla a tam avangin buh chingtute tan a ṭha hlo hle tih a sawi a, Department-in buh an enchhin ṭhenkhat te pawh beisei ang thar phaklo tur te a awm thu a sawi bawk.

Pu K.Laltlanmawia chuan leilet neitu leh enkawltu ten an buh thar hralh chhuah lam an ngaihtuah lo tih sawiin, anmahni tui tih zawng leh an khamkhawp chauh thar tuma buh chin an uar tlat chu ṭhalo a tih thu a sawi a, tunah hian Zawlpui-ah Rice Mill din tum a nih thu leh chumi hunah chuan loneitute pawhin buh hralh chhuah tam lam ngaihtuaha buh thar hlâwk chi chin an uar a rin thu a sawi a, Agriculture Department chhinchhiah dan chuan kum khata thla 3 daih tur chiah Mizoram-ah buh kan la thar chhuak tih a sawi a, leilet neituten buh thar hlâwk chi chin uar se chuan kan buh thar chhuah hi a pun theih a beisei thu a sawi.

Tun hma lam ngaihtuah chuan tunah chuan leilet siam a awlsam tawh tih sawiin, loneitute tan Agriculture Department-in loneituten Tractor an hawh theihna tur Custom Hiring Centre a siamsak thu pawh a sawi a, Custom Hiring Centre-a tractor an pek te chu Leilet neitu ten darkar khat ah Rs.800/- vela an hman theih thu sawiin, a hma chuan darkar khatah Rs.1,000/- chuang te a nih thu leh duh huna tractor hman tur awm loh vanga loneituten harsatna an tawh ṭhin pawh sutkian a nih thu a sawi a, Serchhip Zawlpui phai-a hman tur hian Tractor pakhat pek leh tum a nih thu a sawi bawk. Hei bakah hian leilet neitu ten an leilet kum khata vawi thum thlawhfai ṭhin pawh tunah chuan kum khatah vawi khat chiah thlawhfai a ngai tawh tih a sawi bawk.

Tuna leilet neituten buh an chin mek te chu seng a hun dawn hnai a, buh an seng veleh loneitute chu thlasik thlai chin chhunzawmtir nghal an tum tih AEO chuan a sawi a, hemi rual hian Agriculture Department chuan Thlasik thlai engemaw zat enchhinna turin an ching ve nghal dawn tih a sawi bawk.

Serchhip Agriculture Department-a AEO hian RKVY hnuaia Zawlpui phai-a Tui-chhunchhuah an siam pawh enpuiin Tuichhunchhuah hi tam zawk siam leh tum a nih thu leh heng te hi thlasik thlai te châwmna atan ṭangkai taka hman theih an beisei tih a sawi a, hei bakah hian NEDP hnuaia Purunsen ching tura hma an lakna kal mek pawh tlawhpuiin, tunah hian Purunsen chi hi Nursery-ah kuiṭiah mek a ni a, tunhma lama Leilet neitu ṭhenkhat ten an lo chin tawh ṭhin dan ang ni lova chin tum a nih thu a sawi a, Serchhip District tan Purunsen chin tur Kg. 75 a awm tih a sawi.

Editor
C.Lalrochhuanga, New Serchhip, Serchhip - 796181 Mizoram Contact: 8974286711
http://www.zothlifim.com

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.